اقتاۋلىق وقۋشى قاجىمۇقان بالۋان تۋرالى كوميكس شىعاردى
اقتاۋ. قازاقپارات - 10-سىنىپتا وقيتىن رامازان سۇگىرباي كاسىپقوي بالۋان، الىپ كۇش يەسى - قاجىمۇقان مۇڭايتپاس ۇلى تۋرالى مالىمەتتەردى سۋرەتپەن ارلەپ، كوميكس كىتاپ جاساپ شىعاردى.
اقتاۋ قالاسىنداعى № 13-مەكتەپ- گيمنازياسىندا ءبىلىم الاتىن وقۋشى كوميكس ارقىلى اتى اڭىزعا اينالعان باتىرلاردىڭ بەينەسى مەن ەرلىگىن جاستارعا جەتكىزگىسى كەلەدى. كوميكس - ادەبيەت پەن بەينەلەۋ ونەرى ۇشتاسقان جانر.
رامازان: «كولەمى وتە ۇلكەن، دەرەكتەرى، كوپ اقپاراتتى جاستارعا وسىنداي فورماتتا جەتكىزگەن ءتيىمدى»، - دەيدى.
- كوميكستە وقيعا جەلىسى سۋرەت ارقىلى بەينەلەنەدى جانە وتە قىسقا ءماتىن جازىلادى. جالپى ادامعا توم-توم كىتاپتاردى وقىپ شىعۋعا بىرنەشە اي ۋاقىت قاجەت. ال كوميكس ارقىلى قىسقا ۋاقىتتا قاجەتتى ءارى مول مالىمەتتەردى بىلۋگە بولادى. ۋاقىتتى ۇنەمدەۋگە كومەكتەسەدى، - دەيدى وقۋشى.
رامازانعا كوميكس جاساپ شىعارۋدى اكەسى ۇسىنعان.
- سۋرەت سالۋ - مەنىڭ حوببيىم. ءبىر كۇنى اكەم كىشكەنتاي بالالارعا ارناپ كوميكس جاساۋدى ۇسىندى. باسىندا «مۇمكىن ەمەس نارسە» سياقتى بولىپ كورىندى. سۋرەت سالۋعا يكەمىم بولعان سوڭ، قازاق ەرتەگىلەرىنىڭ ءبىرى «كول تاۋىساردى» سالىپ كوردىم. سۋرەتتى ءبىر ەمەس، بىرنەشە رەت سالعاندا كەيىپكەردىڭ بەينەسى شىعا باستادى. كەيىن قاجىمۇقان مۇڭايتپاس ۇلىنىڭ وسى كوميكسىن قۇراستىرىپ شىقتىم، - دەيدى اۆتور.
رامازانعا اتاقتى بالۋان تۋرالى كوميكس ازىرلەۋگە ءبىر اي ۋاقىت جەتكىلىكتى بولعان.
- كوميكس كىتاپ قۇراستىرار الدىندا قاجىمۇقان اتامىز تۋرالى وقىپ، فيلمىن كورىپ شىقتىم. بۇل كوميكس ارقىلى بالالاردى سپورتقا، ونىڭ ىشىندە كۇرەسكە شاقىرعىم كەلدى. تاعى ءبىر ماقساتىم - ءبىزدىڭ 4-5 جاستاعى كىشكەنتاي وقىرماندارىمىز وراسان كۇشتىڭ يەسى، بوز كىلەمدە تالاي بالۋاندى جەڭگەن قازاقتىڭ باتىرى تۋرالى بىلسە دەگەن وي بولدى، - دەيدى رامازان سۇگىرباي.
رامازان الداعى ۋاقىتتى حالىق ەرتەگىسى «تولاعايدىڭ» كوميكس نۇسقاسىن ازىرلەپ، وقىرماندارعا ۇسىنۋدى جوسپارلايدى.
اۆتور
اياگوز ءىزباساروۆا
