اقتاۋدا ءبىر مەزەتتە 120 وقۋشى كۇي تارتتى
اقتاۋ قالاسىنداعى نازاربايەۆ زياتكەرلىك مەكتەبىنىڭ وقۋشىلارى تاۋەلسىزدىك مەرەكەسى قارساڭىندا قابيبوللا سىديىقوۆ اتىنداعى وبلىستىق كىتاپحانادا «ۇلى دالا مۇراگەرلەرى» دومبىراشىلار شەرۋىن وتكىزدى، دەپ حابارلايدى Kazinform.
«ۇلى دالا مۇراگەرلەرى» دومبىراشىلار شەرۋى مەكتەپتە جىل سايىن وتكىزىلىپ كەلەدى. ءىس-شارانىڭ باستى ماقساتى - تاۋەلسىزدىك مەرەكەسىن ۇلىقتاۋمەن قاتار، مەكتەپ وقۋشىلارىنا ۇلتتىق ءداستۇردى ناسيحاتتاۋ.
مەرەكەلىك ءىس-شاراعا «قوس پەرنە» دومبىراشىلار انسامبلىنەن قۇرالعان 120 كۇيشى قاتىسقان. ولار حالىق كۇيلەرىنەن پوپپۋري، «تورجورعا»، «ەركە سىلقىم» سەكىلدى كۇيلەردى ءبىر ۋاقىتتا ورىنداعان.
«حالقىمىزدىڭ مادەنيەتى مەن مۋزىكاسىن دارىپتەۋ، وسكەلەڭ ۇرپاقتى ۇلتتىق قۇندىلىقتى ۇلىقتاۋعا تاربيەلەۋدە بۇل ءىسشارانىڭ ماڭىزى زور ەكەنىن ايتقىم كەلەدى. نازاربايەۆ زياتكەرلىك مەكتەپتەرىنىڭ قوسىمشا ءبىلىم بەرۋدى دامىتۋدىڭ 2030-جىلعا دەيىنگى كونتسەپتسياسى نەگىزىندە 7-سىنىپتار ءۇشىن دومبىرا ساباعى مىندەتتى تۇردە وتكىزىلەدى»، - دەدى مەكتەپ ديرەكتورى رينات نۇرلان ۇلى.
