اقتاۋدا بلوگەر قاراۋسىز قالعان ءيت-مىسىقتى تاماقتاندىرۋدىڭ وزگەشە جولىن ۇسىندى
اقتاۋ. KAZINFORM - اقتاۋلىق ۆلاديسلاۆ پروحوروۆ ءوزى ويلاپ تاپقان راديومەن باسقارىلاتىن ويىنشىق كولىكتى بەينەكامەرا جانە ارنايى تاباقشامەن جابدىقتاپ، قاڭعىباس جانۋارلاردى قورەكتەندىرىپ ءجۇر.
ءوڭىردىڭ قوعامدىق كوممۋنيكاتسيا ورتالىعىنىڭ مالىمەتىنشە، قالا تۇرعىنىنىڭ بۇل ارەكەتى كوپشىلىكتىڭ سۇيىسپەنشىلىگىنە بولەنىپ ۇلگەرگەن.
- ءبىر جىلدان استام ۋاقىت بۇرىن يەسىز قالعان ءيت-مىسىقتى كۇندەلىكتى قالاي تاماقتاندىراتىنىمدى كورسەتەتىن بلوگ جۇرگىزە باستادىم. بۇرالقى يتتەر مەن مىسىقتاردىڭ تاڭسىق ارەكەتى، قورەگىنە اۋىز سالماس بۇرىن ءجيى يىسكەيتىنى مەنى تاڭ قالدىردى. جانۋارلاردىڭ ءوز ازىعى ءۇشىن ايلا-قۋلىعى ءتۇسىرىلىم بارىسىنداعى ەڭ قىزىقتى كادرلار دەۋگە بولادى. مەنىڭ مۇنداعى كوزدەگەنىم - قوعام نازارىن يەسىز جانۋارلارعا اۋدارىپ، ولارعا قامقورلىق جاساۋعا ۇگىتتەۋ. ارەكەتىمنىڭ ناتيجەسىندە ادامدار قاڭعىباس يتتەر مەن مىسىقتارعا تاماق بەرىپ باستادى. مەن ءۇشىن بۇل ۇلكەن كورسەتكىش بولىپ وتىر، - دەيدى ۆلاديسلاۆ پروحوروۆ.
سونداي-اق، بلوگ اۆتورى اۋرۋ مىسىقتار مەن يتتەردى ەمدەيتىنىن ايتىپ وتىر.
- تۇسىرگەن بەينەجازبالارىمدا مىسىقتىڭ اۋىرىپ تۇرعانى بايقالسا، كورەرمەندەرىم ونى ەمدەۋگە ۇسىنىس تاستايدى. ءتىپتى، كەيبىرەۋلەرى مىسىقتى ەمدەۋ ءۇشىن اقشا جىبەرەدى. مىسالى، 12 جاستاعى ماركيز ەسىمدى مىسىقتى كەزدەستىردىم. ونىڭ جاعدايى وزگە مىسىقتارمەن ۇنەمى توبەلەسكەندىكتەن وتە ناشار ەدى. ماركيز ءومىر سۇرگەن اۋلانىڭ تۇرعىندارى ونى ماعان بىردەن بەرگىسى كەلگەن جوق. دەسە دە، ولاردى كوندىرىپ اۋىرىپ تۇرعان مىسىقتى 5 كۇن بويى دارىگەرگە اپارىپ، ەمدەپ الدىم. وكىنىشكە قاراي، جاقىندا جاسى كەلگەن بۇل مىسىقتىڭ ولگەنىن ەستىدىم، - دەدى ۆلاديسلاۆ پروحوروۆ.
اۆتور
جانات قاپالبايەۆا
