اقتاۋدا بانكتىڭ 10 ميلليون تەڭگەسىن ۇرلاعان ينكاسساتور ءوزىن اتىپ ءولتىردى

اقتاۋ. قازاقپارات  - 42 جاستاعى ينكاسساتوردىڭ 10 ميلليون تەڭگە ۇرلاپ، بانكتىڭ جەرتولەسىنە جاسىرىنعانى، ارتىنشا تابەلدىك قارۋدان باسىنان اتقانى تۋرالى اقپارات الەۋمەتتىك جەلىدە تارادى.

حابارلاماداعى مالىمەتكە سۇيەنسەك، وقيعا 14-شاعىن اۋداندا ورنالاسقان « حالىق بانك» عيماراتىندا بولعان. جەرتولەگە كىرە- بەرىس جەردى قۇزىرلى ورگان قىزمەتكەرلەرى قورشاپ تاستاعان. وقيعانى ماڭعىستاۋ وبلىستىق پوليتسيا دەپارتامەنتى راستادى.

- ۇرلىق جانە ءوزىن- ءوزى ولتىرۋگە دەيىن جەتكىزۋ دەرەكتەرى بويىنشا اقتاۋ قالاسى پوليتسيا باسقارماسىمەن قىلمىستىق ءىس تىركەلدى. قازىرگى ۋاقىتتا تەرگەۋ امالدارى جۇرگىزىلۋدە. تەرگەۋ مۇددەسى ءۇشىن وزگە مالىمەتتەر جاريا ەتىلمەيدى، - دەيدى پوليتسيا دەپارتامەنتىنىڭ باسپا ءسوز حاتشىسى ايگەرىم يباتتۋللايەۆا.

وسى وقيعاعا قاتىستى « Halyk ينكاسساتسيا» سەرىكتەستىگى پىكىر ءبىلدىردى.

- قازىرگى ۋاقىتتا قايعىلى وقيعا بولعان «Halyk ينكاسساتسيادا» جەدەل-تەرگەۋ ءىس-شارالارى جۇرگىزىلىپ جاتىر. وسىعان بايلانىستى كومپانيا تەرگەۋ اياقتالعانعا دەيىن ءىستىڭ ءمان-جايىنا قاتىستى پىكىر ءبىلدىرۋ مەن جاريا ەتۋدەن باس تارتادى. «Halyk ينكاسساتسيا» سەرىكتەستىگى مەن «Halyk Bank» مارقۇمنىڭ تۋىستارى مەن جاقىندارىنا كوڭىل ايتادى، - دەلىنگەن حابارلامادا.

اۆتور
اياگوز ءىزباسارىىوۆا