اقتاۋدا 200 دەن استام تۇرعىن ارزان تەلەفون الامىن دەپ الاياققا الدانعان
اقتاۋ. KAZINFORM - اقتاۋلىقتار الەۋمەتتىك جەلىدە اۋديتورياسى كوپ بەلسەندىلەردىڭ جارناماسىنا سەنگەن. ولار ارزان باعادا تەلەفون الۋ ءۇشىن الاياققا قاراجاتتارىن اۋدارعان. شىعىن كولەمى 140 ميلليون تەڭگەنى قۇرادى.

ماڭعىستاۋ وبلىستىق پروكۋراتۋراسىنىڭ مالىمەتىنشە، كۇدىكتىنىڭ ۇستىنەن بىرنەشە تۇرعىن شاعىمدانعان. سول سەبەپتى ول ءۇيقاماققا الىندى.
- قازىرگى ۋاقىتتا تەرگەۋ ءجۇرىپ جاتىر. سوت ۇكىمىمەن كۇدىكتىگە قاتىستى ءۇيقاماق تۇرىندەگى بۇلتارتپاۋ شاراسى قولدانىلدى. ءالى دە تەرگەۋ جالعاسادى. جابىرلەنۋشىلەر كەلىپ جاتىر،- دەيدى وبلىستىق پروكۋرورىنىڭ باسقارما باسشىسى دانيار تولەگەنوۆ.
مامانداردىڭ ايتۋىنشا ماڭعىستاۋ وبلىسىندا كەيىنگى 5 ايدا الاياقتىق بويىنشا قىلمىس سانى 10 پايىزعا كوبەيگەن. ال، اتالعان وقيعا بويىنشا كۇدىكتىنىڭ قىلمىسى دالەلدەنسە،10 جىلعا دەيىن باس بوستاندىعىنىنان ايرىلۋى مۇمكىن.