اقتاۋدا جاراقات العان اسكەري قىزمەتشىنىڭ جاعدايى اۋىر
استانا. KAZINFORM - ماڭعىستاۋ وبلىسى اقتاۋ قالاسىندا اسكەري وقۋ-جاتتىعۋ كەزىندە جارالانعان اسكەري قىزمەتشىگە قاجەتتى كومەك كورسەتىلىپ جاتىر، دەپ حابارلايدى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.
ۆەدومستۆونىڭ مالىمەتىنشە، زارداپ شەككەن اسكەري قىزمەتشىلەردىڭ ءبىرى ماڭعىستاۋ وبلىستىق كوپبەيىندى اۋرۋحاناسىنا جەتكىزىلدى. قازىرگى ۋاقىتتا ناۋقاس دارىگەرلەردىڭ تۇراقتى باقىلاۋىندا.
- وعان بارلىق قاجەتتى مەديتسينالىق كومەك تولىق كولەمدە كورسەتىلىپ جاتىر. اسكەري قىزمەتشىنىڭ قازىرگى جاعدايى تۇراقتى اۋىر دەپ باعالانىپ وتىر. ماماندار قاجەتتى ەمدەۋ شارالارىن جالعاستىرىپ، ناۋقاستىڭ دەنساۋلىق جاعدايىن تۇراقتى باقىلاۋدا ۇستاپ وتىر. جاعداي ماڭعىستاۋ وبلىسىنىڭ دەنساۋلىق ساقتاۋ باسقارماسىنىڭ باقىلاۋىندا، - دەلىنگەن حابارلامادا.
ەسكە سالايىق، 2026-جىلعى 24-قىركۇيەكتە كاسپييدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى. قالعاندارىن ىزدەۋ جۇمىستارى جالعاسىپ جاتىر.
كەيىنىرەك اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.
ماڭعىستاۋ وبلىسىندا اسكەري قىزمەتشىلەردىڭ قازا بولۋ سەبەپتەرىن تەرگەپ-تەكسەرۋ جونىندەگى ۇكىمەتتىك كوميسسيا قۇرىلدى.
كوميسسيا قۇرامىنا قورعانىس ءمينيسترى، ماڭعىستاۋ وبلىسىنىڭ اكىمى، ەڭبەك جانە حالىقتى الەۋمەتتىك قورعاۋ، توتەنشە جاعدايلار، دەنساۋلىق ساقتاۋ، كولىك مينيسترلىكتەرىنىڭ باسشىلىعى، باس اسكەري پروكۋرور، سونداي-اق شەكارا قىزمەتىنىڭ وكىلدەرى كىردى.
سونىمەن قاتار، پرەزيدەنت قاسىم- جومارت توقايەۆ ماڭعىستاۋ وبلىسىندا اسكەري وقۋ-جاتتىعۋ كەزىندەگى قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان- تۋىستارىنا كوڭىل ايتتى.
اسكەريلەردىڭ قازاسىنان كەيىن اقتاۋدا ءۇش كۇنگە جوسپارلانعان مەرەكەلىك شارالار وتپەيتىن بولدى.
