اقتاۋ تۇبىندەگى ۇشاق اپاتىنىڭ سەبەپتەرى قاشان ناقتى ايتىلادى

استانا. KAZINFORM — كولىك ۆيتسە-ءمينيسترى تالعات لاستايەۆ Kazinform اگەنتتىگىنىڭ BIZDI ORTA پودكاستىندا وسى سۇراققا جاۋاپ بەردى.

— جالپى ستاندارت بويىنشا 30 كۇننىڭ ىشىندە تەرگەۋدىڭ الدىن الا نەمەسە ارالىق قورىتىندىسى جاريالانۋى كەرەك. ياعني، ۇشاقتىڭ جەرمەن تۇيىسكەن كەزدەگى ىزدەر، قيراندىلار جينالادى. ءبىز اقتاۋ اۋەجايىندا انگار اشتىق. ونداعىلار باس الماي جۇمىس ىستەپ جاتىر، — دەيدى ۆيتسە-مينيستر.

ءال ماجىلىس دەپۋتاتى كونستانتين اۆەرشين مۇنداي نازىك ماسەلەنى بارىنشا بايىپتى پايىمداۋ كەرەكتىگىن ايتادى.

— ماجىلىستەگى قورعانىس جانە قاۋىپسىزدىك ماسەلەسىنە جاۋاپتى كوميتەتتىڭ مۇشەسى رەتىندە قازىر الەمدە تۋربۋلەنتتى جاعداي قالىپتاسىپ وتىرعانىن ايتار ەدىم. شارتتى تۇردە ايتساق، الەمنىڭ ءار تۇكپىرىندە قايعىلى وقيعالار جيىلەپ كەتتى. قازاقستاندى بوتەن كيكىلجىڭدەرگە كيلىكتىرۋ ءۇشىن از اقشا جۇمسالىپ جاتقان جوق. ونداي ماقساتقا ءتۇرلى اقپاراتتىق سىلتاۋ قولدانىلۋى مۇمكىن. سوندىقتان قازاقستان ازاماتتارىن تەك رەسمي اقپارات كوزدەرىنە عانا سەنۋگە ۇندەيمىن، — دەدى دەپۋتات.

ەسكە سالساق، 25-جەلتوقساندا اقتاۋ ماڭىندا Azerbaijan Airlines ۇشاعى اپاتقا ۇشىرادى.

ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاپتى. وكىنىشكە قاراي، مەرت بولعان جانداردىڭ اراسىندا 6 قازاقستان ازاماتى بولعان.

اپاتتان كەيىن كەشە قازاقستان بورتتاعى وزدىگىنەن جازعىش قۇرالداردى برازيلياعا جىبەرگەنىن جازدىق.

وسىعان دەيىن «قارا جاشىكتىڭ» برازيلياعا نەلىكتەن جىبەرىلەتىندىگى تۋرالى ساراپشىلاردىڭ پىكىرىن بەرگەن ەدىك.

سونداي-اق، «قارا جاشىكتى» وقۋعا نەشە كۇن كەتەتىنى تۋرالى اۆياتسيا ينجەنەرىنىڭ جاۋابىن جاريالادىق.