اقتاۋ ماڭىنداعى ۇشاق قۇلاعان جەردەن تاعى ءبىر قارا جاشىك تابىلدى
استانا. KAZINFORM - كەشە اقتاۋ ماڭىندا ۇشاق اپاتقا ۇشىراپ، كەيىن قارا جاشىك تابىلعان ەدى. بۇگىن تاعى ءبىر قارا جاشىك تابىلعانى بەلگىلى بولدى. بۇل تۋرالى ماڭعىستاۋ وبلىسىنىڭ كولىك پروكۋرورى ابىلايبەك وردابايەۆ ءمالىم ەتتى.
— بورتتان ەكى قارا جاشىك تابىلدى. اۋە وقيعالارىن تەرگەۋ باسقارماسىنا تاپسىرىلىپ، كەيىن ولار قارالادى، — دەدى ماڭعىستاۋ وبلىسىنىڭ كولىك پروكۋرورى ابىلايبەك وردابايەۆ اقتاۋدا وتكەن باسپا ءسوز ءماسليحاتىندا.
سونداي-اق كولىك پروكۋرورى ۇشاق قۇلاعان جەردە جۇرگىزىلگەن جۇمىستار تۋرالى ايتتى.
— زارداپ شەككەندەردەن جانە جەردەگى قىزمەت قىزمەتكەرلەرىنەن جاۋاپ الىندى. سونداي-اق بارلىق كۋاگەردى انىقتاپ جاتىرمىز. ديسپەتچەرلەر مەن ەكيپاج اراسىنداعى راديوستانتسيا بويىنشا كەلىسسوزدەر جازباسى الىندى. وقيعا ورنىن تەكسەرۋدى اياقتاۋ ساتىسىندا 4 مىڭ شارشى مەتردەن استام اۋماقتى پوليتسيا كۇشىمەن كۇزەتۋ قامتاماسىز ەتىلدى، — دەپ تولىقتىردى سپيكەر.
ايتا كەتەيىك، اقتاۋ ماڭىنداعى ۇشاق اپاتىنان قايتىس بولعان قازاقستاندىقتاردىڭ وتباسىنا مەملەكەتتىك قارجىلاي قولداۋ كورسەتىلەدى.
بۇعان دەيىن ۇكىمەت باسشىسىنىڭ ورىنباسارى قانات بوزىمبايەۆ اقتاۋ ماڭىنداعى ۇشاق اپاتىنىڭ سەبەبىنە قاتىستى تۇسىنىك بەردى.
ودان بولەك، ۇشاق اپاتىنان زارداپ شەككەندەردىڭ قازىرگى جاعدايى ايتىلدى.
