اقتاۋ ماڭىنداعى ۇشاق اپاتىنىڭ الدىن الا ەسەبى جاريالاندى
استانا. KAZINFORM — ق ر كولىك مينيسترلىگى اقتاۋ ماڭىنداعى ۇشاق اپاتىنىڭ الدىن الا ەسەبىن جاريالادى.

Azerbaijan Airlines اۋە كومپانياسىنىڭ Embraer-190 ۇشاعىمەن بولعان وقيعا سەبەپتەرى كولىكتەگى وقيعالار مەن وقىس وقيعالاردى تەكسەرۋ دەپارتامەنتىنىڭ ەسەبىندە ءمالىم ەتىلگەن.
الدىن الا ەسەپتە ازىرگە اۆياتسيالىق وقيعانى تەرگەۋ جونىندەگى كوميسسياعا كەلىپ تۇسكەن قولدا بار ماعلۇمات جازىلعان. ۇسىنىلعان اقپارات الدىن الا جازىلعاندىقتان، بارلىق ماتەريال زەرتتەۋ ناتيجەلەرى بويىنشا ناقتىلانۋى جانە تولىقتىرىلۋى مۇمكىن. جۇمىس اياقتالعاننان كەيىن اۆياتسيالىق وقيعانى تەرگەۋ ناتيجەلەرى بويىنشا تۇپكىلىكتى ەسەپ دايىندالادى.
وسىلايشا، قۇجاتتا اتاپ وتىلگەندەي، 2024-جىلدىڭ 25-جەلتوقسانىندا جەرگىلىكتى ۋاقىت بويىنشا ساعات 11:28 دە (06:28 UTC) اقتاۋ اۋە ايلاعىنىڭ 11-ۇشۋ-قونۋ جولاعىنا قونۋ كەزىندە «ازەربايجان حاۆا يوللارى» - «Azerbaijan Airlines» جاق يەلىك ەتەتىن Embraer 190-100 IGW2 4K- AZ65 ۇشاعى اۆياتسيالىق اپاتقا ۇشىرادى. اۋە كەمەسى باكۋ (UBBB) - گروزنىي (URMG) باعىتى بويىنشا تۇراقتى J2- 8243 جولاۋشىلار رەيسىن ورىنداعان. گروزنىي اەرودرومىنا ەكى رەت قونا الماعاندىقتان ەكيپاج باكۋگە ورالۋدى ۇيعارعان.
ءارى قاراي، 05:13:31-دە CVR- دەن الىنعان جازبالاردا دىبىستىق سوققى تىركەلگەن، اۆتوپيلوتتى («AUTO PILOT») جانە اۆتوماتتى تارتۋدى (RI «ThrottlE») ءوشىرۋ تۋرالى دىبىستىق دابىل ىسكە قوسىلعان. قايتۋ پروتسەسىندە ساعات 05:13:32 دە ۇشاقتىڭ نەگىزگى باسقارۋ جۇيەلەرى جوعالعان.
05:13:34 - 3-گيدروجۇيەدەگى قىسىم 0 PSI- گە دەيىن تومەندەگەن. 3-گيدروجۇيەدەگى سۇيىقتىق دەڭگەيى %0- عا دەيىن تومەندەگەن. باسقارۋ رۋلدەرى نولدىك كۇيدە بەكىتىلەدى جانە ۇشۋ اياقتالعانشا وسى قالىپتا قالعان.
05:13: 36 - تانگاج بويىنشا اۋە كەمەسىن تريممەرلەۋ جۇيەسىنىڭ ىستەن شىعۋى تىركەلگەن.
05:13: 39 - FDR مالىمەتتەرى بويىنشا، كابينانىڭ رازگەرمەتيزاتسياسى باستالعانى (ساڭىلاۋدىڭ پايدا بولۋى) تىركەلگەن.
05:13:47 - «HYD 2 LOW PRESS» دابىلى ىسكە قوسىلعان. 1-گيدروجۇيەدەگى قىسىم 0 PSI- گە دەيىن، سۇيىقتىق دەڭگەيى %0- عا دەيىن تومەندەگەن.
05:14: 58 - CVR مالىمەتتەرى بويىنشا، ىشكى بايلانىس كومانديرى جاعدايدى ناقتىلاۋ ءۇشىن كابينا ەكيپاجىنا حابارلاسقان: «اللو، نە بوپ قالدى؟». بورتسەرىك: «2 ورىندىق جارىلدى، مەن... كەلە المايمىن، ويتكەنى جولاۋشىلار ورنىنان تۇرىپ كەتتى، سولاردى وتىرعىزىپ جاتىرمىن»، - دەگەن.
ساعات 05:42 دە ەكيپاج اپاتتى تۇردە قونۋ ءۇشىن اقتاۋ قوسالقى اۋە ايلاعىنا بارۋ شەشىمىن قابىلداعان.
ۇشاق بورتىندا 5 ەكيپاج مۇشەسى مەن 62 جولاۋشى بولعان. اۆياتسيالىق وقيعا سالدارىنان اۋە كەمەسىنىڭ كومانديرى، ەكىنشى ۇشقىش، اعا بورتسەرىك جانە 35 جولاۋشى (بارلىعى 38) قازا تاپتى، 2 بورتسەرىك جانە 27 جولاۋشى ءتۇرلى دارەجەدە دەنە جاراقاتىن الدى. جەرگە سوقتىعىسۋ كەزىندە ۇشاق قيراپ، ءىشىنارا ورتەنگەن.
تەكسەرۋ جۇمىستارىنا ۇشاقتى جاساعان ۇيىمنىڭ (Embraer S. A. ،Empresa Brasileira de Aeronautica S. A. ) جانە «ازەربايجان حاۆا يوللارى» جاق («Azerbaijan Airlines») اۋە كومپانياسىنىڭ وكىلدەرى قاتىسۋدا.
ايتا كەتەيىك، 25-جەلتوقساندا اقتاۋ ماڭىندا باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىراعان بولاتىن.
بورتتا 67 ادام، ونىڭ ىشىندە بەس ەكيپاج مۇشەسى بولعان. اپات سالدارىنان 38 جولاۋشى قازا تاۋىپ، 29 ادام امان قالعان ەدى.
پرەمەر-ءمينيستردىڭ ورىنباسارى قانات بوزىمبايەۆ ينتەرنەتتە تاراعان نۇسقا مەن «قارا جاشىكتەگى» مالىمەت اراسىندا ۇلكەن ايىرماشىلىق بار ەكەنىن ايتقان ەدى. سونداي-اق ۇشاق اپاتىنا بايلانىستى رەسەيدە، قازاقستاندا جانە ازەربايجاندا قىلمىستىق ءىس قوزعالعان ەدى.
بۇعان دەيىن برازيليا اسكەري-اۋە كۇشتەرىنىڭ اۋە اپاتتارىن زەرتتەۋ ورتالىعىنىڭ (Cenipa) ماماندارى AZAL اۋە كومپانياسىنىڭ اپاتقا ۇشىراعان Embraer 190 ۇشاعىنىڭ قارا جاشىگىن تالداۋعا كىرىسكەنىن حابارلاعان بولاتىن.
قازاقستان رەسپۋبليكاسى كولىك مينيسترلىگى Azerbaijan Airlines اۋە كومپانياسىنىڭ Embraer-190 ۇشاعىمەن بولعان وقيعانى تەرگەۋ تۋرالى الدىن الا ەسەپتى جاريالادى.
ايتا كەتەيىك، 25-جەلتوقساندا اقتاۋ ماڭىندا باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىراعان بولاتىن.
بورتتا 67 ادام، ونىڭ ىشىندە بەس ەكيپاج مۇشەسى بولعان. اپات سالدارىنان 38 جولاۋشى قازا تاۋىپ، 29 ادام امان قالعان بولاتىن.
سونىمەن قاتار پرەمەر-ءمينيستردىڭ ورىنباسارى قانات بوزىمبايەۆ ينتەرنەتتە تاراعان نۇسقا مەن «قارا جاشىكتەگى» مالىمەت اراسىندا ۇلكەن ايىرماشىلىق بار ەكەنىن ايتقان ەدى. سونداي-اق ۇشاق اپاتىنا بايلانىستى رەسەيدە، قازاقستاندا جانە ازەربايجاندا قىلمىستىق ءىس قوزعالعان ەدى.