اقتاۋ ماڭىنداعى ۇشاق اپاتىن تەرگەۋگە تۇركيادان كەلگەن ماماندار جۇمىلدىرىلدى

بۇل تۋرالى تۇركيانىڭ كولىك جانە ينفراقۇرىلىم ءمينيسترى ابدۋلكادير ۋرالوگلۋ مالىمدەدى، دەپ حابارلايدى Anadolu Ajansi.

ونىڭ ايتۋىنشا، ازەربايجان اۋە جولدارىنىڭ قۇلاعان ۇشاعىن تەرگەۋگە 8 ادامنان تۇراتىن تۇرىك ماماندارى توبى قاتىسادى. ساراپتاما كوميسسياسى ازەربايجان مەملەكەتتىك ازاماتتىق اۆياتسيا اگەنتتىگىنىڭ ءوتىنىشى بويىنشا قۇرىلعان.

- ءبىز تەحنيكالىق جانە وپەراتسيالىق تالداۋ جۇرگىزىپ، قاجەتتى قولداۋ كورسەتەمىز. ءبىز قۇزىرلى ورگاندارمەن كەلىسە وتىرىپ، وقيعانىڭ تولىق ءمان-جايىن انىقتاپ، ناتيجەلەرىن حابارلايتىن بولامىز، - دەدى ول.

ورالوگلۋ دەلەگاتسيانىڭ 27 -جەلتوقسان كۇنى كەشكە باكۋگە اتتانعانىن ايتتى.

- تۇركيا كەز كەلگەن جاعدايدا ءازىربايجاندى قولدايدى، - دەدى ول.

مينيستر ۇشاق اپاتىندا قازا تاپقانداردىڭ جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىن تىلەدى.

بۇعان دەيىن اقتاۋعا اپاتقا ۇشىراعان Embraer ۇشاعىنىڭ وندىرۋشىلەرى كەلگەنى حابارلانعان بولاتىن.