اقتاۋ ماڭىنداعى ۇشاق اپاتى: زارداپ شەككەندەردىڭ قازىرگى احۋالى قانداي

استانا. KAZINFORM - اقتاۋ قالاسىنداعى اۋەجاي ماڭىندا جولاۋشىلار ۇشاعىنىڭ اپاتقا ۇشىراۋى سالدارىنان زارداپ شەككەن 29 ادامنىڭ 27 ءسى ماڭعىستاۋ وبلىستىق اۋرۋحاناسىنا جەتكىزىلدى. بۇل تۋرالى دەنساۋلىق ساقتاۋ مينيسترلىگىنەن حابارلادى.

پاتسيەنتتەر ءارتۇرلى جاراقاتتارمەن، نەگىزىنەن بىرنەشە زاقىمدارمەن ءتۇستى، ولاردىڭ دەنى - ميدىڭ جابىق جاراقاتى، ميدىڭ شايقالۋى، كەۋدە قۋىسىنىڭ جابىق جاراقاتتارى، تراۆماتيكالىق شوك.

- 26 - جەلتوقسان كۇنى تاڭەرتەڭ 11 پاتسيەنت رەانيماتسيا بولىمشەسىندە، 13 ءى- تراۆماتولوگيا بولىمشەسىندە، 2 ەۋى - نەيروحيرۋرگيا بولىمشەسىندە، 1 ەۋى - حيرۋرگيا بولىمشەسىندە ەم الدى.

پاتسيەنتتەردىڭ جاعدايى بويىنشا: ەكەۋى اسا اۋىر جاعدايدا، 11 ءى اۋىر جاعدايدا، 14 ءى  ورتاشا اۋىرلىق دارەجەسىندە، 2 پاتسيەنتتىڭ شاعىمى جوق، قاناعاتتانارلىق جاعدايدا.

11 پاتسيەنتتىڭ سەگىزى وكپەنى جاساندى جەلدەتۋ اپپاراتىندا جاتىر جانە دارىلىك سەداتسيا، تونيكتەر قابىلداۋدا. كەلىپ تۇسكەن كەزدە بارلىق زارداپ شەككەندەرگە قاجەتتى زەرتتەپ-قاراۋ تۇرلەرى جۇرگىزىلدى، جاعدايى تۇراقتانعاننان كەيىن بەيىنى بويىنشا ەمدەۋگە جاتقىزىلدى، - دەپ جازدى ۆەدومستۆودان.

دەنساۋلىق ساقتاۋ مينيسترلىگى زارداپ شەككەندەرگە مەديتسينالىق كومەك تولىق كولەمدە كورسەتىلەتىنىن اتاپ ءوتتى.

دارىگەرلەر اۋىر پاتسيەنتتەردىڭ جاعدايىن تۇراقتاندىرۋ ءۇشىن بارلىق مۇمكىن شارالاردى قابىلداۋدا، اۋرۋحانا ءدارى- دارمەكتەرمەن، جابدىقتارمەن جەتكىلىكتى تۇردە قامتاماسىز ەتىلگەن.

بۇعان دەيىن حابارلانعانداي، استانادان اقتاۋعا اۋە اپاتىنان زارداپ شەككەندەرگە مەديتسينالىق كومەك كورسەتۋ ءۇشىن سانيتاريالىق اۆياتسيا ۇشاعى جىبەرىلگەن.

بورتتا قۇرامىندا ەكى رەانيماتولوگ، 4 تراۆماتولوگ، نەيروحيرۋرگ جانە كومبۋستيولوگ بار ق ر دەنساۋلىق ساقتاۋ مينيسترلىگىنىڭ ۇلتتىق شۇعىل مەديتسينانى ۇيلەستىرۋ ورتالىعىنىڭ موبيلدىك بريگاداسى كەلدى.

زارداپ شەككەندەردىڭ جاعدايى جانە ولاردىڭ ەمدەلۋ بارىسى تۋرالى قوسىمشا دەرەكتەر اقپارات جاڭارتىلعان سايىن ۇسىنىلاتىن بولادى.

رەسەي تاراپىمەن كەلىسسوزدەردەن، مامانداردىڭ كونسۋلتاتسيالارىنان كەيىن بۇگىن ر ف اپاتتار مەديتسيناسىنىڭ بورتىمەن اقتاۋدان ماسكەۋگە 9 پاتسيەنت، رەسەي ازاماتتارى جىبەرىلدى.