اقتاۋ ماڭىنداعى ۇشاق اپاتى: پرەزيدەنت ماراپاتتاعان ازاماتتاردىڭ ءتىزىمى جاريالاندى
استانا. KAZINFORM - پرەزيدەنت قاسىم- جومارت توقايەۆ ازەربايجاننىڭ Azal كومپانياسىنا تيەسىلى ۇشاقتىڭ اپاتقا ۇشىراۋىنان زارداپ شەككەن ادامداردى قۇتقارۋ كەزىندە ەرلىك، كاسىبيلىك جانە ازاماتتىق جاۋاپكەرشىلىك تانىتقانى ءۇشىن ءبىر توپ قازاقستاندىقتى مەملەكەتتىك ناگرادالارمەن ماراپاتتادى.
اقوردانىڭ باسپا ءسوز قىزمەتى ماراپاتتالعان ازاماتتاردىڭ ءتىزىمىن جاريالادى.
بۇعان دەيىن حابارلانعانداي، ولاردىڭ اراسىندا ت ج م وكىلدەرى، مەديتسينا ماماندارى، پوليتسەيلەر، «ماڭعىستاۋ وڭىرلىك ەلەكتروتوراپتىق كومپانياسى» اكسيونەرلىك قوعامىنىڭ جۇمىسشىلارى جانە اقتاۋ اۋەجايىنىڭ قىزمەتكەرلەرى بار.
مەملەكەت باسشىسىنىڭ جارلىعىمەن ماڭعىستاۋ وبلىسى پوليتسيا دەپارتامەنتىنىڭ كريميناليسى ايبەك الىبايەۆ باۋىرجان مومىش ۇلى اتىنداعى Ⅱ دارەجەلى «ايبىن»، ماڭعىستاۋ وبلىسى تجد باسقۇدىق اۋىلى №12 ءورت ءسوندىرۋ ءبولىمىنىڭ كومانديرى سەرىكبولات وڭعار راقىمجان قوشقاربايەۆ اتىنداعى Ⅲ دارەجەلى «ايبىن» وردەندەرىمەن، ماڭعىستاۋ وبلىستىق كوپسالالى اۋرۋحاناسىنىڭ ورتالىق مەڭگەرۋشىسى باقىتجان قويبەكوۆ پەن اقتاۋ حالىقارالىق اۋەجايى مەديتسينالىق بەكەتىنىڭ مەڭگەرۋشىسى يرينا كوچەرگينا «قۇرمەت» وردەندەرىمەن ماراپاتتالدى.
«ەرلىگى ءۇشىن» مەدالىمەن ماڭعىستاۋ وبلىستىق جەدەل جانە شۇعىل مەديتسينالىق جاردەم ستانتسياسىنىڭ فەلدشەرى تيمۋر قيسايەۆ، ق ر توتەنشە جاعدايلار مينيسترلىگى اپاتتار مەديتسيناسى ورتالىعىنىڭ ماڭعىستاۋ وبلىسى بويىنشا فيليالىنىڭ دارىگەرى وسپان ورازبەكوۆ، «قازاەروناۆيگاتسيا» رم ك اقتاۋ فيليالىنداعى «ۆىشكا» ديسپەتچەرلىك بەكەتىنىڭ ديسپەتچەرى ياروسلاۆ تولستيكوۆ، «ماڭعىستاۋ وڭىرلىك ەلەكتروتوراپتىق كومپانياسى» اكسيونەرلىك قوعامى اقتاۋ ەلەكتر جەلىلەر اۋدانىنىڭ شەبەرى نۇرالى شوپانوۆ ماراپاتتالدى.
اقتاۋ حالىقارالىق اۋەجايىنىڭ قىزمەت باستىعىنىڭ ورىنباسارى بەكبولات جۇماعۇلوۆ، ق ر ادىلەت مينيسترلىگى «سوت ساراپتامالارى ورتالىعى» ماڭعىستاۋ وبلىسى بويىنشا فيليالىنىڭ مامانى ەلدار ورازاليەۆ «ەرەن ەڭبەگى ءۇشىن» مەدالدارىنىڭ يەگەرى اتاندى.
سونىمەن قاتار 51 ادامعا پرەزيدەنتتىڭ العىسى جاريالاندى.
ەسكە سالا كەتەيىك، 25 - جەلتوقساندا اقتاۋ ماڭىندا Azerbaijan Airlines ۇشاعى اپاتقا ۇشىرادى.
