اقتاۋ ماڭىنداعى ۇشاق اپاتى. رەسەيلىك كومپانيا AZAL- عا وتەماقى تولەدى
استانا. KAZINFORM - «الفاستراحوۆانيە» ازەربايجان اۋە كومپانياسىمەن بىرلەسىپ، زارداپ شەككەن جولاۋشىلاردىڭ جانە قازا بولعانداردىڭ تۋىستارىنا وتەماقى تولەدى، دەپ حابارلايدى Kazinform ءتىلشىسى.
حابارلامادا تاۋەكەلدىڭ نەگىزگى بولىگىن رەسەيدىڭ ۇلتتىق قايتا ساقتاندىرۋ كومپانياسى (RNRC) قايتا ساقتاندىرعانى ايتىلعان. ساقتاندىرۋ شارتىندا سونىمەن قاتار سوعىس جانە تەرروريزم تاۋەكەلدەرى قامتىلعان. تاسىمالداۋشىنىڭ رەيستەگى جولاۋشىلار الدىنداعى جاۋاپكەرشىلىگى 1999-جىلعى مونرەال كونۆەنتسياسىمەن رەتتەلەدى. الايدا، تولەمدەردىڭ تولىق سوماسى جاريالانبايدى.
رەسەيلىك ب ا ق كومپانيا باس ديرەكتورىنىڭ اۆياتسيا جانە عارىشتى ساقتاندىرۋ جونىندەگى ورىنباسارى يليا كاباچنيككە سىلتەمە جاساي وتىرىپ، جولاۋشىلارعا كەلتىرىلگەن شىعىندى تولەۋ قازىردىڭ وزىندە جۇرگىزىلىپ جاتقانىن حابارلايدى. ونىڭ ايتۋىنشا، اپاتقا ۇشىراعان AZAL- دىڭ Embraer 190 ۇشاعى، سونداي-اق تاسىمالداۋشىنىڭ جولاۋشىلار الدىنداعى جاۋاپكەرشىلىگىن «الفاستراحوۆانيە» ساقتاندىرعان، ال تاۋەكەلدىڭ نەگىزگى بولىگىن رەسەي ۇلتتىق قايتا ساقتاندىرۋ كومپانياسى قايتا ساقتاندىرعان. ۇشاقتىڭ تولىق ساقتاندىرۋ تولەمى اقپان ايىندا جاسالدى.
ول سونداي-اق كومپانيانىڭ جول اپاتىنا قاتىستى قىزمەتتىك تەرگەۋدىڭ اياقتالۋىن كۇتۋدىڭ قاجەتى جوق ەكەنىن اتاپ ءوتتى. اپاتقا قاتىستى تەرگەۋ جالعاسىپ جاتقانىمەن، ساقتاندىرۋشىلار تولەمدەردى جۇزەگە اسىرۋ ءۇشىن جەتكىلىكتى اقپاراتقا يە.
- ساقتاندىرۋشى رەتىندە ءبىز ءۇشىن ۇشاقتىڭ اپاتقا ۇشىراۋىنىڭ ءوزى ماڭىزدى فاكت، بۇل كۇمان تۋدىرمايدى. سوعىس جانە تەرروريزم قاۋپى دە ساقتاندىرىلعاندىقتان، اۋەكومپانيا كەز كەلگەن جاعدايدا وتەماقى الادى، - دەپ اتاپ ءوتتى كاباچنيك.
«الفاستراحوۆانيە» جولاۋشىلارعا كەلتىرىلگەن شىعىندى جانە تاسىمالداۋشىنىڭ جابىرلەنۋشىلەر مەن ولاردىڭ زاڭدى وكىلدەرىنىڭ الدىنداعى جاۋاپكەرشىلىگى ءۇشىن ساقتاندىرۋ تولەمدەرىن اعىمداعى جىلدىڭ قاڭتارىندا ەسەپتەي باستادى، پروتسەسس جالعاسۋدا، دەپ حابارلايدى كومپانيا.
ايتا كەتەيىك، 25-جەلتوقساندا اقتاۋ ماڭىندا باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىرادى. بورتتا 67 ادام، ونىڭ ىشىندە بەس ەكيپاج مۇشەسى بولعان. اپات سالدارىنان 38 جولاۋشى قازا تاۋىپ، 29 ادام امان قالدى.
تاياۋدا اقتاۋ ماڭىنداعى ۇشاق اپاتى بويىنشا تەرگەۋدىڭ ەسەبى جاريالاندى.
بۇگىن اقتاۋداعى ۇشاق اپاتىنان كەيىن كولىك وقيعالارىن تەرگەۋ جونىندەگى ارنايى ورتالىق قۇرىلاتىنى بەلگىلى بولدى.
سونىمەن قوسا ۇشاق اپاتىنىڭ سەبەبى جىل سوڭىنا دەيىن انىقتالاتىنى ايتىلدى.
