اقتاۋ ماڭىنداعى ۇشاق اپاتى: قازىر قانداي جۇمىستار اتقارىلىپ جاتىر
ق ر ت ج م باسپا ءسوز قىزمەتى اقتاۋ ماڭىندا اپاتقا ۇشىراعان ۇشاققا قاتىستى سوڭعى دەرەكتەردى جاريالادى. قازىرگى ۋاقىتتا وقيعا ورنىندا ۇشاقتىڭ كونسترۋكتسيالارىن بولشەكتەۋ جۇمىستارى جالعاسىپ جاتىر.
وقيعا سالدارىن جويۋعا 306 ادام، 101 بىرلىك تەحنيكا، 2 اۋە كەمەسى جانە 6 كينولوگيالىق ەسەپتوپ جۇمىلدىرىلعان. جۇمىستارعا توتەنشە جاعدايلار، ىشكى ىستەر، قورعانىس مينيسترلىكتەرىنىڭ، ۇلتتىق ۇلاننىڭ، مەملەكەتتىك ەمەس ورتكە قارسى قىزمەتتىڭ، اپاتتار مەديتسيناسى ورتالىعىنىڭ، جەدەل مەديتسينالىق كومەك بريگاداسىنىڭ جانە جەرگىلىكتى اتقارۋشى ورگانداردىڭ، سونداي- اق ازەربايجان ت ج م قىزمەتكەرلەرى تارتىلدى.
ق ر ت ج م اپاتتار مەديتسيناسى ورتالىعىنىڭ بريگادالارى ۇشاق اپاتقا ۇشىراعان جەردە اۆاريالىق- قۇتقارۋ جۇمىستارىن مەديتسينالىق قامتاماسىز ەتۋدى جالعاستىرۋدا. اپاتتار مەديتسيناسى ورتالىعىنىڭ پسيحولوگتارى اقتاۋ قالاسىنا كەلگەن تۋىستارىنا پسيحولوگيالىق كومەك كورسەتۋدە.
- كەشە اۆاريالىق- قۇتقارۋ جۇمىستارىن جۇرگىزۋ ناتيجەسىندە اقتاۋ قالاسىنىڭ مەديتسينالىق مەكەمەلەرىنە 29 ادام، ونىڭ ىشىندە 3 كامەلەتكە تولماعان قۇتقارىلدى جانە اۋرۋحاناعا جاتقىزىلدى. قازا تاپقانداردىڭ 38 مايىتى تابىلدى، ولار مەديتسينالىق ساراپتاما ورتالىعىنا جەتكىزىلدى، ولاردىڭ ىشىندە 6 قازاقستان ازاماتى جانە 3 ەكيپاج مۇشەسى بار. 7 ادامنىڭ دەنەسى انىقتالدى. سونىمەن قاتار كەشە ىزدەۋ توبىنىڭ ناتيجەسىندە ت ج م قۇتقارۋشىلارى قارا جاشىكتى تاپتى. وقيعا ورنىندا تاۋلىك بويى كەزەكشىلىك ۇيىمداستىرىلدى.
قازىرگى ۋاقىتتا اقتاۋ قالاسىندا اپاتتىڭ سەبەپتەرىن تەرگەۋ جونىندەگى ۇكىمەتتىك كوميسسيا جۇمىس ىستەپ جاتىر"، - دەپ جازدى ت ج م- نان.
استانا قالاسىنداعى كوماندالىق ورتالىقتا جانە ماڭعىستاۋ وبلىسىنىڭ ت ج د- دا جەدەل شتابتار مەن جەدەل جەلى تەلەفوندارى جۇمىسىن جالعاستىرۋدا: 87172559621، 87172559683، 87292319091.
جەدەل جەلى تەلەفوندارىنا شۇعىل پسيحولوگيالىق كومەك جانە اقپاراتتىق سيپاتتاعى 1063 ءوتىنىش ءتۇستى.
ەستەرىڭىزگە سالا كەتەيىك، كەشە 25 - جەلتوقساندا ساعات 11.00 دە باكۋ- گروزنىي باعىتىندا ۇشىپ بارا جاتقان Azerbaijan Airlines اۋە كومپانياسىنىڭ اۋە كەمەسىندەگى اۆاريالىق جاعداي تۋرالى اقپارات العان سوڭ اقتاۋ قالاسى اۋەجايىنىڭ اۋدانىنا قازاقستان تجم كۇشتەرى مەن قۇرالدارى دەرەۋ جىبەرىلدى.
ساعات 11.30 دا اۋەجايدان 3 ك م جەردە ۇشاقتىڭ اپاتقا ۇشىراعانى تۋرالى اقپارات ءتۇستى.
سالدارىنان ۇشاقتىڭ فيۋزەلياجىنىڭ ەكى كولدەنەڭ بولىككە (قيراندى اراسىنداعى قاشىقتىق 300 م) اقاۋى پايدا بولدى، سودان كەيىن ۇشقىشتار كابيناسىنىڭ ماڭىندا ءورت شىقتى.
ساعات 11.35 تە كەلگەن قۇتقارۋشىلار ءورتتى سوندىرۋگە كىرىستى، ال ساعات 12.05 تە ءورت تولىعىمەن ءسوندىرىلدى. اپات بولعان جەردىڭ جالپى اۋدانى 4200 شارشى مەتردى قۇرادى.
ۇشاقتىڭ بورتىندا 67 جولاۋشى، ونىڭ ىشىندە 5 ەكيپاج مۇشەسى بولدى.
وقيعا سالدارىن جويۋعا توتەنشە جاعدايلار، ىشكى ىستەر، قورعانىس مينيسترلىكتەرىنەن، ۇلتتىق ۇلاننان، مەملەكەتتىك ەمەس ورتكە قارسى قىزمەتتىنەن، اپاتتار مەديتسيناسى ورتالىعىنان، جەدەل مەديتسينالىق كومەك بريگاداسىنان جانە جەرگىلىكتى اتقارۋشى ورگانداردان 492 ادام، 102 بىرلىك تەحنيكا، 2 اۋە كەمەسى جانە 10 كينولوگيالىق ەسەپتوپ، ونىڭ ىشىندە استانا قالاسىنان بارعان سانيتارلىق بورت جۇمىلدىرىلدى.
