اقتاۋ ماڭىنداعى ۇشاق اپاتى: ۆلاديمير پۋتين يلحام اليەۆتەن كەشىرىم سۇرادى
استانا. KAZINFORM - رەسەي تاراپىنىڭ باستاماسىمەن ۆلاديمير پۋتين ءازىربايجان رەسپۋبليكاسىنىڭ پرەزيدەنتى يلحام اليەۆپەن تەلەفون ارقىلى سويلەستى.
25-جەلتوقسان كۇنى قازاقستاننىڭ اقتاۋ قالاسىنا جاقىن ماڭدا ازەربايجان اۋە كومپانياسىنىڭ جولاۋشىلار ۇشاعىنىڭ اپاتقا ۇشىراۋىنا قاتىستى ماسەلەلەر جان-جاقتى تالقىلاندى.
ۆلاديمير پۋتين قايعىلى وقيعانىڭ رەسەي اۋە كەڭىستىگىندە ورىن العانى ءۇشىن كەشىرىم سۇراپ، قازا بولعانداردىڭ وتباسىلارىنا تاعى دا تەرەڭ كۇيزەلىسپەن كوڭىل ايتتى. سونىمەن بىرگە زارداپ شەككەندەردىڭ تەزىرەك ساۋىعىپ كەتۋىن تىلەدى.
اڭگىمە بارىسىندا كەستە بويىنشا ۇشاتىن ازىربايجاننىڭ جولاۋشىلار ۇشاعى گروزنىي اۋەجايىنا بىرنەشە رەت قونۋعا ارەكەتتەنگەنى ايتىلدى. سول كەزدە گروزنىي، موزدوك جانە ۆلاديكاۆكازعا ۋكراينالىق جاۋىنگەرلىك ۇشقىشسىز ۇشاتىن اپپاراتتار شابۋىل جاساعان، ال رەسەيلىك اۋە قورعانىس جۇيەلەرى بۇل شابۋىلدارعا تويتارىس بەرگەن.
رەسەيدىڭ تەرگەۋ كوميتەتى ق ك 263-بابى (اۋە كولىگىن پايدالانۋ جانە قوزعالىس قاۋىپسىزدىگى قاعيدالارىن بۇزۋ) بويىنشا قىلمىستىق ءىس قوزعادى. باستاپقى تەرگەۋ ارەكەتتەرى جۇرگىزىلىپ، ازاماتتىق جانە اسكەري مامانداردان جاۋاپ الىنۋدا.
قازىر ازەربايجان باس پروكۋراتۋراسىنىڭ ەكى قىزمەتكەرى گروزنىيدا ءجۇر، ولار رەسەي فەدەراتسياسىنىڭ باس پروكۋراتۋراسى مەن تەرگەۋ كوميتەتىنىڭ وكىلدەرىمەن بىرلەسە جۇمىس ىستەپ جاتىر. رەسەي، ازەربايجان جانە قازاقستاننىڭ ءتيىستى قىزمەتتەرى اقتاۋ قالاسىنىڭ ىرگەسىندەگى اپات ورنىندا تىعىز ىنتىماقتاستىقتا جۇمىس جۇرگىزۋدە.
ايتا كەتەيىك، اشحاباد - ماسكەۋ - اشحاباد باعىتىندا ۇشاتىن تۇراقتى رەيستەر توقتاتىلدى.
