اقتاۋ گارنيزونىنىڭ مىڭنان استام تەڭىز جاياۋ اسكەرى جاۋىنگەرلىك اتىستارعا قاتىسىپ جاتىر
استانا. KAZINFORM - بولىمشەلەردىڭ جاۋىنگەرلىك اتىس دايىندىعى تاكتيكالىق دايىندىقتى وقىتۋدىڭ ەڭ جوعارى تۇرىنە جاتادى، ءارى بولىمشەلەردى جاۋىنگەرلىك ۇيلەستىرۋ مەن اتىس جاتتىعۋلارىنىڭ سوڭعى كەزەڭى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.
اسكەري قىزمەتشىلەر بۇعان دەيىن قىسقى وقۋ كەزەڭىندەگى ماماندىق بويىنشا دايىندىق بارىسىندا شتاتتىق قارۋ-جاراق پەن اسكەري تەحنيكانىڭ تاكتيكالىق-تەحنيكالىق سيپاتتامالارىن زەردەلەپ، ساپتىق جانە اتىس دايىندىعىنان دەربەس تۇردە وتكەن بولاتىن.
- اسكەري قىزمەتشىلەر «ويماشا» پوليگونىندا قازىرگى زامانعى جالپى اسكەري ۇرىستى جۇرگىزۋ، قورعانىس كەزىندە، شابۋىلداۋ مەن جەرگىلىكتى جەردى بارلاۋ بارىسىندا ءىس-قيمىل جاساۋ داعدىلارىن پىسىقتاپ جاتىر. ساباقتىڭ ۇشتەن ءبىرى تۇنگى جاعدايدا وتۋدە، - دەپ ءتۇسىندىردى شابۋىلداۋ باتالونىنىڭ كومانديرى مايور فارحات مانابايەۆ.
بولىمشەلەردىڭ ۇيلەسىمدىلىگى تاكتيكالىق تاپسىرمالاردى ورىنداۋ كەزىندە تەكسەرىلەدى. كومانديرلەر اتىستى باسقارۋ مەن بولىمشەرلەردىڭ ۇرىس قيمىلدارىنان تاجىريبە السا، اسكەري قىزمەتشىلەر بولىمشە قۇرامىنداعى ءىس-قيمىل ءتارتىبىن بەكىتەدى.
- جاۋىنگەرلىك اتىستاردى ورىنداۋ كەزىندە بولىمشە كومانديرىنىڭ ءىس-قيمىلى ونىڭ بولىمشەنى شاپشاڭ، دۇرىس جانە ناقتى باسقارۋ قابىلەتىنە قاراي باعالانادى، - دەپ ناقتىلادى باتالون كومانديرى.
جاۋىنگەرلىك دايىندىق ءىس-شارالارىنا 50 گە جۋىق اسكەري تەحنيكا جۇمىلدىرىلعان. جاۋىنگەرلىك دايىندىقتىڭ كەلەسى كەزەڭى ۆزۆودتاردى ۇيلەستىرۋ بولماق.
