اقمولانىڭ تاعى ءبىر اۋدانىندا توتەنشە جاعداي جاريالاندى

كوكشەتاۋ. KAZINFORM - اقمولا وبلىسىنىڭ بۇلاندى اۋدانىندا 12-ءساۋىر ساعات 18:00 دەن باستاپ توتەنشە جاعداي جاريالاندى.

اۋدان اكىمى ارداق سمايىلوۆ سۋ تاسقىنىنا بايلانىستى جاساعان ۇندەۋىندە وڭىردە توتەنشە جاعداي جاريالانعانىن، سونداي-اق، تابيعي اپاتتان كەلتىرىلگەن زالالدى جويۋمەن جانە ازايتۋمەن اينالىساتىن كوميسسيا قۇرىلعانىن اتاپ ءوتتى.

«بۇگىنگى تاڭدا زارداپ شەككەن ادامدارعا ماتەريالدىق كومەك كورسەتۋ ءۇشىن بارلىق ۇيلەردى كوميسسيا تەكسەرىپ، كەلگەن شىعىن كولەمىن ەسەپتەيتىن بولادى»، - دەدى اۋدان اكىمى ارداق سمايىلوۆ.

ايتۋىنشا، اۋداندا سۋ تاسقىنىن الدىن الۋ ءۇشىن اۋقىمدى جۇمىس جۇرگىزىلگەن.

قاۋىپ تونگەن اۋىلدار ازىق-تۇلىكپەن، ءدارى-دارمەكپەن قامتاماسىز ەتىلدى.

زارداپ شەككەندەرگە كومەك كورسەتۋ بويىنشا جەدەل ءىس-شارالاردى وتكىزۋگە جەرگىلىكتى اتقارۋشى ورگانداردىڭ، سونداي-اق ءوڭىر ت ج د كۇش-قۇرالدارى تارتىلدى.

سۋ باسقان ۇيلەردەگى بارلىق تۇرعىندار ەۆاكۋاتسيالاندى.

ايتا كەتسەك، 10-ءساۋىر كۇنى بۋراباي اۋدانىنداعى قاراجار بوگەتى جارىلىپ، كۋپچانوۆكا، ۆوزنەسەنكا، كاپيتونوۆكا جانە جۋراۆليەۆكا اۋىلدارىن سۋ باسىپ قالدى.

ەسكە سالايىق، بۇدان بۇرىن كوكشەتاۋ قالاسى مەن اتباسار اۋدانىندا سۋ تاسقىنىنا بايلانىستى توتەنشە جاعداي جاريالانعانىن جازعان ەدىك.

كەيىن جارقايىڭ جانە ەسىل اۋداندارىندا دا جەرگىلىكتى دەڭگەيدە توتەنشە جاعداي جاريالاندى.