اقمولالىق ۆولونتەرلەر سۋ تاسقىنىمەن بەلسەندى كۇرەسىپ، تۇرعىندارعا كومەكتەسىپ جاتىر
كوكشەتاۋ. KAZINFORM - اقمولا وبلىسىندا ۆولونتەرلەر سۋ تاسقىنىمەن كۇرەسۋ جانە الدىن الۋ شارالارىنا اتسالىسىپ جاتىر. ۆولونتەرلەر قار كۇرەۋ، ارىقتاردى تازالاۋ جۇمىستارى كەزىندە جانە قۇتقارۋشىلار مەن سۋ تاسقىنىنان زارداپ شەككەندەردى ىستىق تاماقپەن قامتاماسىز ەتۋدە بەلسەندىلىك تانىتتى.
سەلينوگراد اۋدانىنىڭ قاراوتكەل اۋىلىندا ۆولونتەرلەر قارت ادامدار تۇراتىن ۇيلەردىڭ اۋلالارىنداعى قاردى كۇرەپ، سۋ اعاتىن جىرالاردى تازارتۋعا كومەكتەسۋدە. بۇدان بولەك، ۆولونتەرلەر اۋىلداعى ۇيلەرگە سۋ كىرمەۋى ءۇشىن 500 قاپقا قۇم تولتىرىپ قويدى. وسىنداي جۇمىستارى قوشقاربايەۆ جانە قابانباي اۋىلدارىندا قولعا الىندى، مۇندا ءارى اۋىلدا 750 قاپتان ازىرلەندى. سونىمەن بىرگە، ۆولونتەرلەر سۋ تاسقىنىنان جاپا شەككەندەر مەن قۇتقارۋشىلاردى ىستىق شاي جانە تاماقپەن قامتاماسىز ەتىپ جاتىر.
قوسشى قالاسى مەن تايتوبە اۋىلىنىڭ اۋماعىندا سۋ تاسقىنىنا قارسى ءىس-شارالار اياسىندا توپىراقتان تۇرعىزىلعان جاساندى بوگەتتىڭ وسال تۇسىن نىعايتۋ ءۇشىن 150 ادام، 4 ارنايى تەحنيكا جۇمىلدىرىلعان. وندا ۆولونتەرلەردىڭ كومەگىمەن 200 توننا ينەرتتىك ماتەريالدار قاپتارعا سالىنىپ، توسەلدى. سونىمەن قاتار قالانىڭ جەكە شاعىن اۋداندارىندا 9 ارنايى تەحنيكا قاردى كۇرەپ شىعارىپ جاتىر. 19 شاعىن اۋداندا، ارال جانە قاجىمۇقان كوشەلەرىندە 5 سۋسورعىش ماشينا ەرىگەن قار سۋىن سورۋدا. تايتوبە اۋىلىندا ۇزىندىعى 1 شاقىرىم بولاتىن سۋ بوگەتى تۇرعىزىلدى. وندا 3 ارنايى تەحنيكا جۇمىس ىستەپ جاتىر.
ەرەيمەنتاۋ ادانىنىڭ جاستار رەسۋرستىق ورتالىعىنىڭ جانە اگروتەحنيكالىق كوللەدجىنىڭ ۆولونتەرلەرى قالا اكىمدىگىنە سۋ تاسقىنىنا قارسى جۇمىستا كومەك كورسەتىپ جاتىر. جەتى ۆولونتەرلەر قاپتاردى ينەرتتى ماتەريالمەن تولتىرىپ، سۋ باسۋ قاۋپى بار تۇرعىن ۇيلەردىڭ اينالىسىنا قويدى.
بۋراباي اۋدانىندا قازىرگى ۋاقىتتا جاعداي تۇراقتى. دەگەنمەن شۋچە قالاسىندا جاستار رەسۋرستىق ورتالىعى مەن «ليدەر. ك ز. دوبروە سەردتسە» قوعامدىق قورىنىڭ 5 ادامنان تۇراتىن ۆولونتەرلەرى سۋ تاسقىنىنىڭ الدىن الۋ جۇمىستارىمەن اينالىسىپ جۇرگەن كوممۋنالىق قىزمەتتەر مەن ت ج د قىزمەتكەرلەرىنە ىستىق شاي، باۋىرساق ۇلەستىرىپ جاتىر.
اتباسار اۋدانىندا 15 ادامنان تۇراتىن ۆولونتەرلەر شتابى قۇرىلدى. ولار سۋ باسۋ ايماعىندا تۇراتىن تۇرعىندارعا حابارلامالار تاراتىپ جاتىر. سونداي-اق جالعىزباستى زەينەتكەرلەر تۇراتىن ۇيلەردىڭ ماڭىن قاردان تازارتىپ، سۋ اعارلارىن رەتكە كەلتىردى.
ارشالى اۋدانىندا ۆولونتەرلەر سۋ تاسقىنىنا قارسى كۇرەسىپ جاتىر. زەرەندى اۋدانىنىڭ شاعالالى اۋىلىنان 20، سادوۆىي اۋىلىنان 5 جانە الەكسەيەۆكا اۋىلىنان 10 ۆولونتەر سۋ تاسقىنىنا قارسى كۇرەسۋدە بەلسەندىلىك تانىتتى.
ساندىقتاۋ اۋدانىندا شتاتتىق رەجيمدە جۇمىس جۇرگىزىلىپ جاتىر. وسى كەزەڭدە ۆولونتەرلەر نەگىزىنەن جالعىزباستى زەينەتكەرلەرگە كومەكتەسۋدى نازارعا الدى. ولار تۇرعىن ۇيلەردى سۋدان قورعاۋ ءۇشىن اۋلاداعى ەرگىن قار سۋىن سىرتقا اعىزۋ ءۇشىن جىرالار جاسادى. ءار اۋىلدىق وكرۋگتە 7-10 ۆولونتەردەن بار. شامامەن بارلىعى 70-85 ۆولونتەر اتسالىسىپ جاتىر.
ال كوكشەتاۋ قالاسى بويىنشا اقمولا وبلىسى «ۆولونتەرلەردى قولداۋ ورتالىعى» فرونت-كەڭسەسى جانە «دوبروە سەردتسە. ليدەر. ك ز» قوعامدىق قورىنىڭ ۆولونتەرلەرى ت ج د جانە پ د قىزمەتكەرلەرىن، كوممۋنالدىق قىزمەت جۇمىسشىلارىن، سونداي-اق سۋت تاسقىنىنان زارداپ شەككەندەردى ىستىق تاعامدارمەن قاتاماسىز ەتتى.
سونىمەن قاتار ۆولونتەرلەردىڭ كومەگىمەن سۋ باسۋ قاۋپى بار اۋماقتارعا ينەرتتى ماتەريالدار توسەۋ، ارىقتاردى اشۋ جانە قار مەن مۇزدان تازارتۋ جۇمىستارى جۇرگىزىلىپ جاتىر. قازىرگى ۋاقىتتا كوكشەتاۋ قالاسىندا ەكى مەكەنجاي بويىنشا گۋمانيتارلىق كومەك ورنى بەكىتىلىپ، پۋنكت قاجەتتى زاتتاردى قابىلداپ جاتىر. سونىڭ ءبىرى اقمولا وبلىسىنىڭ جاستار-رەسۋرستىق ورتالىعى جانىنداعى «ۆولونتەرلەردى قولداۋ ورتالىعى» فرونت-كەڭسەسى مەن «ق ر قىزىل جارتى اي» قوعامدىق بىرلەستىگىنىڭ اقمولا وبلىسى بويىنشا فيليالى بىرلەسىپ ۇيىمداستىرعان م. ساعديەۆ كوشەسى 29، 1-قابات مەكەنجايدا ورنالاسقان پۋنكتى.
«بۇگىنگى كۇنى اتالعان قابىلداۋ پۋنكتىندە 800 ك گ جۋىق قاجەتتى زات جينالدى. شامامەن 50 ۆولونتەردىڭ قاتىسۋىمەن سۋ تاسقىنى سالدارىنان زارداپ شەككەن 50 ادامعا گۋمانيتارلىق كومەك كورسەتىلدى»، - دەدى اقمولا وبلىسىنىڭ جاستار- رەسۋرستىق ورتالىعىنىڭ قىزمەتكەرى جەڭىس بالابەكوۆ.
ايتا كەتسەك، بۇدان بۇرىن اقمولا وبلىسىنا استانا قالاسىنان 85-كە جۋىق تەحنيكا كومەككە كەلگەنىن جازعان ەدىك
اۆتور
اسلان وسپانوۆ
