اقمولالىق تۇرعىن تەرمينالدى تەلەفون دەپ ويلاپ ۇرلاپ كەتكەن

اقمولا وبلىسى تۇرعىنى دۇكەننەن تەلەفون ۇرلايمىن دەپ تەرمينالدى الىپ كەتكەن، - دەپ حابارلايدى ءى ءى م باسپا ءسوز قىزمەتى.

اتباسار قالاسىنىڭ پوليتسيا بولىمىنە كاسىپكەردىڭ ارىزى تۇسكەن. ايەلدىڭ سوزىنشە، 12- قاراشادا كەشكى ساعات 19.30 شاماسىندا دۇكەن سورەسىنەن بەلگىسىز ادام تەرمينالدى ۇرلاپ كەتكەن. زالال سوماسى 68 مىڭ تەڭگە بولىپتى.

پوليتسيا ءبولىمى بۇل دەرەكتى ق ر قىلمىستىق كودەكستىڭ 188-بابى «ۇرلىق» بويىنشا سوتالدى تەرگەپ-تەكسەرۋدىڭ ءبىرىڭعاي تىزىلىمىنە تىركەدى.

ۇرلىق بولعان ءسات دۇكەننىڭ بەينەباقىلاۋ كامەراسىنا ءتۇسىپ قالعان. ۆيدەودا ساتىپ الۋشى پاكەتىنە زاتتارىن سالىپ جاتىپ، ساتۋشىنىڭ جانىنداعى جاسىل قاپتاماداعى تەرمينالدى الا كەتكەنىن كورۋگە بولادى.

جەدەل ىزدەستىرۋ ءىس-شارالارى بارىسىندا پوليتسەيلەر جاقىن ماڭداعى اۋىلداردىڭ ءبىرىنىڭ 36 جاستاعى تۇرعىنىنىڭ ۇرلىققا قاتىسى بار ەكەنىن انىقتادى. ەر ادام قۇرىلعىنى تەلەفون دەپ ويلاپ، ونى ساتقىسى كەلگەنى بەلگىلى بولدى.