اقمولاداعى ستەپنوگوردە بانك فيليالىنىڭ ديرەكتورى مەن كاسسيرى 255 ميلليون تەڭگەنى جىمقىرعان
كوكشەتاۋ. KAZINF0RM - ستەپنوگوردە 255 ميلليون تەڭگەنى جىمقىرعان بانك فيليالىنىڭ ديرەكتورى مەن كاسسيرى سوتتالدى. ولاردىڭ ءارقايسىسى 7 جىلعا باس بوستاندىعىنان ايىرىلدى.
اقمولا وبلىسى سوتى باسپا ءسوز قىزمەتىنىڭ مالىمەتىنشە، ستەپنوگور قالاسىنداعى ەكىنشى دەڭگەيدەگى بانك بولىمشەسىنىڭ ديرەكتورى مەن كاسسيرى ءسوز بايلاسىپ، بانك اقشاسىن جىمقىرىپ، اسا ءىرى مولشەردە ماتەريالدىق شىعىن كەلتىرگەن.
«2022 -جىلدىڭ قاراشا- جەلتوقسان ايلارى ىشىندە كاسسير ديرەكتوردىڭ نۇسقاۋى بويىنشا 1 ميلليون، 3 ميلليون، 8 ميلليون تەڭگە اقشا سومالارىن بانكتىڭ قويماسىنان الىپ، ديرەكتورعا تۇراقتى تۇردە بەرىپ وتىرعان. بانك ديرەكتورى اقشاعا ارنالعان پاكەتتەر مەن سومكەنى الدىن الا كاسسيرگە دايىنداپ، سودان كەيىن ونى بانك عيماراتىنان شىعارىپ وتىرعان. تەكسەرۋ اكتىسى كورسەتكەندەي، بانك بولىمشەسىندە جەتىسپەۋشىلىك سوماسى 255 ميلليون استام تەڭگە قۇراعان»، - دەدى ۆەدومستۆودان.
سوتتالۋشىلاردىڭ كىناسى تەكسەرۋ اكتىسىمەن، اۋديتورلىق ەسەپپەن، اقشانىڭ جەتىسپەۋى تۋرالى ساراپتاما قورىتىندىسىمەن، كۋاگەرلەردىڭ ايعاقتارىمەن، سوتتالۋشىلاردىڭ وزدەرى مويىنداعان ايعاقتارىمەن، بانكتىڭ بەينەباقىلاۋ كامەرالارىنان جازبالارمەن جانە ءىستىڭ باسقا دا ماتەريالدارىمەن دالەلدەندى.
وسىلايشا، بانك ديرەكتورى مەن كاسسيرى ءسوز بايلاسىپ، قىزمەتتىك بابىن پايدالانا وتىرىپ، اسا ءىرى مولشەردە اقشا جىمقىردى (ق ك-نىڭ 189-بابى 4-بولىگىنىڭ 2-بولىمشەسى).
«جازا تاعايىنداۋ كەزىندە سوت، بانك ديرەكتورىنىڭ ءوز كىناسىن مويىنداعانى، كاسسيردىڭ جاسى مەن وڭ سيپاتتاعى مىنەزدەمەسىن جەڭىلدەتەتىن جاعدايلار دەپ جانە اۋىرلاتاتىن جاعدايلاردىڭ بولماۋىن ەسەپكە الدى. سوت ۇكىمىمەن ءارقايسىسىنا 7 جىلعا باس بوستاندىعىنان ايىرۋ جازاسى تاعايىندالدى. سونىمەن قاتار، سوتتالۋشىلار ۇيىمدار مەن مەكەمەلەردە 5 جىلعا ماتەريالدىق جاۋاپتى لاۋازىمداردى اتقارۋ قۇقىعىنان ايىرىلدى. كەلتىرىلگەن زالالدى ءوندىرىپ الۋ بولىگىندە جابىرلەنۋشىگە سوتقا ازاماتتىق سوت ءىسىن جۇرگىزۋ تارتىبىمەن جۇگىنۋ قۇقىعى ءتۇسىندىرىلدى»، - دەپ تولىقتىردى ۆەدومستۆودان.
سوت ۇكىمى زاڭدى كۇشىنە ەنگەن جوق.
قىلمىستىق قۇقىق بۇزۋشىلىقتاردىڭ الدىن الۋ ماقساتىندا، ۇكىمدى جاريالاۋ بويىنشا سوت وتىرىسىنا بانك فيليالىنىڭ قىزمەتكەرلەرى شاقىرىلدى.
ەسكە سالايىق، قوسشىدا سالىق ورگانىنىڭ قىزمەتكەرى بىرنەشە رەت ينتەرنەت-الاياقتىق جاساعان.
اۆتور
اسلان وسپانوۆ
