اقمولا وبلىسىندا ەسىل وزەنىنەن ەر ادامنىڭ دەنەسى تابىلدى
كوكشەتاۋ. KAZINFORM - اقمولا وبلىسىندا ەسىل وزەنىنەن ەر ادامنىڭ دەنەسى تابىلدى.
اقمولا وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 21-ءساۋىردە ساعات 16:30 شاماسىندا سەلينوگراد اۋداندىق پوليتسيا بولىمىنە ەسىل وزەنى بويىنداعى كوپىردىڭ استىنان ەر ادامنىڭ دەنەسى تابىلعانى تۋرالى حابار تۇسكەن.
«جەدەل-ىزدەستىرۋ ءىس-شارالارى بارىسىندا پوليتسيا قىزمەتكەرلەرى قايتىس بولعان ادامنىڭ جاڭاەسىل اۋىلىنىڭ 52 جاستاعى تۇرعىنى ەكەنىن جانە دەنەسىندە پىشاق جاراقاتتارى بار ەكەنىن انىقتادى. ادام ولىمىنە كۇدىكتى رەتىندە 49 جاستاعى ايەل ۇستالىپ، ۋاقىتشا ۇستاۋ وقشاۋلاعىشىنا قامالدى. قازىرگى كەزدە، سوت-مەديتسينالىق ساراپتاما تاعايىندالىپ، تەرگەۋ شارالارى قولعا الىندى»، - دەدى ۆەدومستۆودان.
ايتا كەتسەك، بۇدان بۇرىن اقمولا وبلىسىندا جاس بالانىڭ مۇردەسى تابىلعانىن جازعان ەدىك.
