اقمولا وبلىسىندا جولدا قالعان 900 گە جۋىق اۆتوكولىك پوليتسياعا ىلەسىپ ءجۇردى

اۋا رايىنا بايلانىستى اقمولا وبلىسىندا بارلىق باعىتتاعى اۆتوجولداردا كولىك قوزعالىسىنا شەكتەۋ قويىلدى. جولدا قالعان 900 گە جۋىق اۆتوكولىك پوليتسيا كولىگىنە ىلەسىپ ءجۇردى، دەپ حابارلايدى Kazinform ءتىلشىسى.

وبلىستىق پ د باسپا ءسوز قىزمەتىنىڭ مالىمەتىنشە، 8-قاڭتاردا وبلىس اۋماعىنداعى دۇلەي جەل مەن اقتۇتىك بورانعا بايلانىستى «الماتى - ەكاتەرينبۋرگ»، «استانا - پەتروپاۆل»، «استانا - قاراعاندى»، «استانا - ەرەيمەنتاۋ - شىدەرتى»، «كوكشەتاۋ - رۋزايەۆكا» باعىتىنداعى حالىقارالىق جانە رەسپۋبليكالىق، سونداي-اق وبلىستىق جانە جەرگىلىكتى ماڭىزى بار جولدار جابىلدى. جولدا قار قۇرساۋىندا قالعان مىڭعا جۋىق اۆتوكولىككە پوليتسيا قىزمەتكەرلەرى كومەكتەستى.

«اۋا رايىنا بايلانىستى پوليتسيا باتالونى مەن پاترۋلدىك پوليتسيا روتاسىنىڭ ەكيپاجدارى كۇشەيتىلگەن رەجيمدە جۇمىس ىستەۋدە. بۇگىن ساعات 13:00-دە استانا قالاسىنا دەيىن 530 (460 جەڭىل، 70 جۇك) اۆتوكولىكتىڭ ءبىرىنشى كولونناسى پوليتسيا كولىگىنە ىلەسىپ ءجۇردى. كەرى باعىتتا 350 كولىك قۇرالىنىڭ تاعى ءبىر كولونناسى پوليتسيا كولىگىنىڭ سوڭىنا ىلەستى»، - دەدى ۆەدومستۆودان.

وسى رەتتە، ءتارتىپ ساقشىلارى تۇرعىندارعا بوراندى كۇندەرى الىس جولعا شىقپاۋعا كەڭەس بەرەدى.

ەسكە سالايىق، قازاقستاننىڭ 9 وبلىسىندا اۋا رايىنا بايلانىستى ەسكەرتۋ جاريالاندى.