اقمولا وبلىسىندا بوراندا اداسىپ قالعان جۇكتى ايەل مەن بالاسى قۇتقارىلدى
اقمولا وبلىسىنىڭ ەرەيمەنتاۋ اۋدانىندا دالادا كولىكتە قالعان جۇكتى ايەل مەن ونىڭ قولى سىنعان بالاسى قۇتقارىلدى. اقتۇتىك بورانعا بايلانىستى قۇتقارۋشىلارعا كومەك سۇراعان ادامداردى جاياۋ ىزدەۋگە تۋرا كەلدى، دەپ حابارلايدى Kazinform.
وبلىستىق ت ج د باسپا ءسوز قىزمەتىنىڭ مالىمەتىنشە، وقيعا 10-قاڭتاردا بولعان. ەركىنشىلىك اۋىلىنىڭ تۇرعىنى قولى سىنعان بالاسىن دارىگەرلەرگە كورسەتۋگە ءۇشىن جولعا شىققان. كولىكتە ۇلىمەن بىرگەن جۇكتى ايەلى دە بولعان. جولدا بۇلاقتان سۋ الۋ ءۇشىن ولار ءجۇرىپ كەلە جاتقان «ەرەيمەنتاۋ- تورعاي» جولىنان بۇرىلعان. كەيىن كولىگىن قالدىرىپ، بۇلاقتان سۋ الماقشى بولعان ەر ادام اداسىپ كەتكەن.
كۇيەۋىنىڭ جوعالعانىنا الاڭداعان ايەل جەدەل جاردەم مەن قۇتقارۋ قىزمەتىنىڭ جەدەل بايلانىس قىزمەتىنە تەلەفون شالىپ، كومەك سۇراعان.
«كومەك تۋرالى حابارلامانى العان ەرەيمەنتاۋ اۋدانىنىڭ ت ج ب باستىعى امانگەلدى دوسكەنوۆ كومەككە ءوزى باستاپ شىعادى. «ترەكول» كولىگىمەن شىققان قۇتقارۋشىلارعا جىلدامدىعى سەكۋندتىنا 30 م/س جەل مەن اقتۇتەك بوران كەدەرگى كەلتىردى. سول سەبەپتى امانگەلدى دوسكەنوۆتىڭ كومەك سۇراعان ادامداردى جاياۋ ىزدەۋىنە تۋرا كەلدى. جەڭىل ۇسىك شالعانىنا قاراماستان ول كولىكتى تاۋىپ، ارىپتەستەرىن شاقىردى. ال ەر ادام بولسا، ءوزى جاقىن ماڭداعى بلوك بەكەتى تاۋىپ بارعان»، - دەپ تولىقتىردى ۆەدومستۆودان.
ايتا كەتسەك، بۇدان بۇرىن اقمولا وبلىسىندا جولدا قالعان 75 ادام ەۆاكۋاتسيالانعانىن جازعان ەدىك.
