اقمولا وبلىسىندا گاز باللونى جارىلىپ، ءۇش ادام مەرت بولدى

استانا. KAZINFORM - اقمولا وبلىسى قورعالجىن اۋدانى سابىندى اۋىلىندا گاز باللونى جارىلىپ سالدارىنان ءۇش ادام قايتىس بولدى جانە 16 ادام ءتۇرلى دەڭگەيدە زارداپ شەكتى. بۇل تۋرالى وبلىستىق توتەنشە جاعدايلار دەپارتامەنتى حابارلايدى.

توتەنشە جاعداي اۋىلداعى بۇرىنعى مەشىتتە اس بەرۋ كەزىندە بولعان.

«وقيعا ورنىنا جەدەل جەتكەن قۇتقارۋشىلار التى گاز باللونىن الىپ شىقتى، بارلىعى جەتى گاز باللونى بولعان. جارىلىستان 1978 -جىلى تۋعان ەر ادام قايتىس بولدى. سونىمەن قوسا قۇتقارۋشىلار ۇيىندىلەردىڭ استىنان 1983 -جىلى تۋعان ايەل مەن 2012 -جىلى تۋعان جەتكىنشەكتىڭ دەنەسىن تاپتى. جەدەل مەديتسينالىق جاردەم بريگاداسى زارداپ شەككەن 16 ادامدى استانا قالاسىنىڭ قالالىق اۋرۋحاناسىنا جەتكىزدى»، - دەلىنگەن حابارلامادا.

قازىر گاز جارىلىسى بولعان جەردە جەكە قۇرامنىڭ 30-عا جۋىق مامانى جانە 5 ت ج د تەحنيكاسى، سونداي-اق جەدەل قۇتقارۋ جاساعى، اپاتتار مەديتسيناسى ورتالىعى، پسيحولوگتار مەن استانا قالاسىنىڭ كينولوگيالىق قىزمەتى جۇمىس ىستەپ جاتىر.

«توتەنشە جاعدايدىڭ سەبەبىن انىقتاۋ ءۇشىن اقمولا وبلىسى جانە استانا قالاسى ت ج د زەرتتەۋ سىناق ءورت زەرتحاناسى تاعايىندالدى. اقمولا وبلىسى ت ج د بازاسىندا جەدەل شتاب اشىلدى، 87162520950 جەدەل جەلىسىنىڭ تەلەفونى جۇمىس ىستەيدى»، - دەپ ەسكەرتەدى وڭىرلىك ت ج د.

ەسكە سالساق، بۇعان دەيىن توتەنشە جاعدايلار مينيسترلىگى حالىق گاز قۇيىپ جۇرگەن باللونداردىڭ كوبى جارامسىز ەكەنىن ەسكەرتكەن ەدى.

استانا قالاسىنىڭ قوعامدىق دەنساۋلىق ساقتاۋ باسقارماسى گاز باللونى جارىلىسىنان زارداپ شەككەن ادامداردىڭ قازىرگى ءحالى تۋرالى مالەمەتپەن ءبولىستى.

«اقمولا وبلىسى قورعالجىن اۋدانى سابىندى اۋىلىنداعى مەشىتتە گاز جارىلىسىنان زارداپ شەككەن 16 ادام استانانىڭ قالالىق ستاتسيونارلارىنا جەتكىزىلدى. ونىڭ ىشىندە 13 ەرەسەك جانە 3 بالا. 7 جابىرلەنۋشى رەانيماتسيا بولىمشەسىندە، 6 ادام استانا قالاسىنىڭ №1-قالالىق اۋرۋحاناسىنىڭ پوليتراۆما، ەندوپروتەزدەۋ جانە كومبۋستيولوگيا بولىمشەسىنە ورنالاستىرىلدى. الدىن الا دياگنوز - ءارتۇرلى دارەجەدەگى جالىننىڭ تەرميالىق كۇيىكتەرى»، - دەلىنگەن حابارلامادا.

ودان بولەك، %25-30 تەرميالىق كۇيىك شالعان 3 بالا قالالىق №2-بالالار اۋرۋحاناسىنىڭ وريت (قارقىندى تەراپيا بولىمشەسى) اۋرۋحاناسىنا جاتقىزىلدى.

«ستاتسيوناردا پاتسيەنتتەر كەلگەن بويدا كومبۋستيولوگ، رەانيماتولوگ، تەراپيەۆت، ستاتسيونار بويىنشا جاۋاپتى دارىگەر قارادى، تراۆماتولوگتار، كومبۋستولوگتار توبى قوسىمشا شاقىرىلدى. زارداپ شەككەندەرگە بارلىق قاجەتتى مەديتسينالىق كومەك كورسەتىلەدى، پاتسيەنتتەردىڭ جاعدايىنىڭ ديناميكاسى بويىنشا اقپارات جاڭارتىلادى»، - دەيدى دەنساۋلىق ساقتاۋ باسقارماسىنان.

اۆتور
داۋلەت ىزتىلەۋ