اقمولا وبلىسىندا اۆتوكولىك پەن ەلەكتروۆوز سوقتىعىسىپ، ءبىر ادام كوز جۇمدى

كوكشەتاۋ. KAZINFORM - اقمولا وبلىسىنىڭ ەسىل اۋدانىندا اۆتوكولىك پەن ەلەكتروۆوز سوقتىعىسىپ، ءبىر ادام كوز جۇمدى، تاعى ءبىر ادام ءتۇرلى دەنە جاراقاتىمەن اۋرۋحاناعا جەتكىزىلدى.

اقمولا وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جول-كولىك وقيعاسى 19-قاڭتاردا ەسىل قالاسىنداعى 7№ اگروتەحنيكالىق كوللەدجىنىڭ ماڭىنداعى تەمىرجول وتكەلىندە بولعان. بۇل تۋرالى جەدەل جاردەم قىزمەتىنىڭ ديسپەتچەرى پوليتسياعا حابارلاعان.

انىقتالعانداي، رەسەي فەدەراتسياسىنىڭ 35 جاستاعى ازاماتى باسقارعان «Lexus RX 300» كولىگى رەتتەلمەيتىن تەمىرجول وتكەلىنەن وتپەك بولعان كەزدە ەسىل قالاسى باعىتىندا ءجۇرىپ بارا جاتقان «درەزينا» ەلەكتروۆوزىمەن سوقتىعىسقان. سالدارىنان اۆتوكولىكتىڭ 32 جاستاعى جولاۋشىسى وقيعا ورنىندا كوز جۇمسا، جۇرگىزۋشىسى ءتۇرلى دەنە جاراقاتىمەن اۋرۋحاناعا جەتكىزىلدى. ال ەلەكتروۆوز جۇرگىزۋشىسى زارداپ شەككەن جوق.

«قازىرگى كەزدە، پوليتسيا جول- كولىك وقيعاسىنا بايلانىستى ءىس قوزعاپ، سوتقا دەيىنگى تەرگەۋ شارالارىن باستاپ كەتتى. وقيعانىڭ ءمان- جايى انىقتالۋدا»، - دەدى ۆەدومستۆودان.

ايتا كەتەيىك، بۇدان بۇرىن «استانا-پەتروپاۆل» تراسساسىندا 15 اۆتوكولىك سوقتىعىسقانىن جازعان ەدىك.