اقمولا وبلىسىندا اۋدان اكىمى مەن باسقارما باسشىسى قاتاڭ سوگىس الدى
كوكشەتاۋ. KAZINFORM - اقمولا وبلىسىندا بۇلاندى اۋدانىنىڭ اكىمى ارداق سمايىلوۆ پەن وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى مارات اۋباكىروۆ قاتاڭ سوگىس تۇرىندە تارتىپتىك جاۋاپقا تارتىلدى.
اقمولا وبلىسى اكىمدىگى باسپا ءسوز قىزمەتىنىڭ مالىمەتىنشە، اۋدان اكىم سۋ تاسقىنىنىڭ سالدارىن جويۋ بويىنشا جۇمىستى ءتيىستى دەڭگەيدە ۇيىمداستىرماعانى ءۇشىن جاۋاپقا تارتىلىپ وتىر.
«كوكتەمگى سۋ تاسقىنىنىڭ سالدارىن جويۋ جونىندەگى ءىس-شارالاردى ۋاقىتىلى ورىنداماعانى، سونداي-اق سۋ تاسقىنىنان زارداپ شەككەن ازاماتتاردىڭ ساپاسىز تىزىمدەرىن قۇراستىرعانى ءۇشىن اقمولا وبلىسى اكىمىنىڭ وكىمىمەن بۇلاندى اۋدانىنىڭ اكىمى ارداق سمايىلوۆ قاتاڭ سوگىس تۇرىندەگى تارتىپتىك جازاعا تارتىلدى»، - دەدى ۆەدومستۆودان.
سونىمەن بىرگە، جارقايىڭ، بۇلاندى اۋداندارىندا سۋ تاسقىنىنان زارداپ شەككەن تۇرعىندارعا ءۇي جانە سەلينوگراد، ءبىرجان سال، بۇلاندى، ساندىقتاۋ اۋداندارى مەن ستەپنوگورسك قالاسىنىڭ بەستوبە كەنتىندە مەكتەپ قۇرىلىسىنىڭ كەستەدەن كەشىگۋىنە سەبەپكەر اقمولا وبلىسى قۇرىلىس، ساۋلەت جانە قالا قۇرىلىسى باسقارماسىنىڭ باسشىسى مارات اۋباكىروۆكە دە قاتاڭ سوگىس جاريالاندى.
ايتا كەتسەك، بۇدان بۇرىن اقمولا وبلىسىندا جۇمىسىنا سالعىرت قاراعان ەكى اۋداننىڭ اكىمىنە قاتاڭ سوگىس جاريالانعانىن جازعان ەدىك.
اۆتور
اسلان وسپانوۆ
