اقمولا وبلىسىندا 11 سىنىپ وقۋشىسى ساباققا بارماي شاحتادان التىن ىزدەگەن

كوكشەتاۋ. KAZINFORM - اقمولا وبلىسىندا جوعالعان 17 جاستاعى جاسءوسپىرىم بەستوبە شاحتاسىنان تابىلدى.

اقمولا وبلىسى پ د باسپا ءسوز قىزمەتىنىڭ مالىمەتىنشە، 16-قىركۇيەكتە ستەپنوگور قالالىق پوليسيا باسقارماسىنا 17 جاستاعى ءجاسوسپىرىمنىڭ جوعالعاندىعى تۋرالى حابار تۇسكەن.

11-سىنىپ وقۋشىسىنىڭ ساباقتى سەبەپسىز بوساتقانىنا مۇعالىمدەر دابىل قاققان.

«وقۋشى 13-قىركۇيەكتەن بەرى مەكتەپكە بارماعان. جەدەل ىزدەستىرۋ شاراسى بارىسىندا جوعالعان جاس ءوسپىرىمنىڭ اتا- اناسى، جاقىن تۋىستارى مەن تانىستارى، دوستارى انىقتالىپ، سۇراستىرىلدى. ناتيجەسىندە جاس ءوسپىرىمنىڭ بەستوبە كەنتى اۋماعىنداعى شاحتاعا تۇسكەنى انىقتالدى. بالا شاحتادان شىعارىلىپ، تۋىستارىنا امان- ەسەن تاپسىرىلدى»، - دەدى ۆەدومستۆودان.

بالانىڭ سوزىنشە، ول شاحتاعا التىن ىزدەۋگە تۇسكەن.

«پوليسيا جاس ءوسپىرىمنىڭ اتا- اناسىنا قاتىستى كامەلەتكە تولماعاندى تاربيەلەۋ، ونىڭ قۇقىقتارى مەن مۇددەلەرىن قورعاۋ جونىندەگى مىندەتتەردى، سونداي-اق ونىڭ قاۋىپسىزدىگىن قامتاماسىز ەتۋ جونىندەگى شارالاردى ورىنداماعانى ءۇشىن اكىمشىلىك حاتتاما تولتىردى. سونىمەن قاتار، كامەلەتكە تولماعان بالانىڭ ءوزى قورعالاتىن وبەكتىگە زاڭسىز كىرگەنى ءۇشىن اكىمشىلىك جاۋاپقا تارتىلدى»، - دەدى ۆەدومستۆودان.

وسى رەتتە، ءتارتىپ ساقشىلارى اتا- انالاردى بالالارىنىڭ ورنالاسقان جەرىن باقىلاۋدى جانە قاۋىپسىزدىك ماسەلەسىن ءجىتى نازاردا ۇستاۋ قاجەتتىگىن ەسكە سالادى.

ايتا كەتسەك، بۇدان بۇرىن اقمولا وبلىسىندا 462 مەكتەپتە قاۋىپسىزدىك ساباعى وتكەنىن جازعان ەدىك.