اقمولا وبلىسى شۋچينسك قالاسىندا بياتلوننان قىسقى ازيا چەمپيوناتى وتەدى

استانا. قازاقپارات - 2024 -جىلعى 10-20-ناۋرىز ارالىعىندا شۋچينسك قالاسىندا قىسقى سپورت تۇرلەرى بويىنشا وليمپيادالىق دايارلاۋ ورتالىعىنىڭ بازاسىندا بياتلوننان جاسوسپىرىمدەر مەن جەتكىنشەكتەر اراسىنداعى ازيا چەمپيوناتى وتەدى.

قازاقستان بياتلونشىلار وداعىنىڭ باسپا ءسوز قىزمەتى ءمالىم ەتكەندەي، بايراقتى باسەكەدە سارى قۇرلىقتىڭ 7 ەلىنەن 100 دەن استام جاس سپورتشىلار 3 ديستسيپلينا بويىنشا ازيا چەمپيونى اتاعىنا تالاسادى. ولاردىڭ قاتارىندا قىتاي تايپەيى، جاپونيا، وڭتۇستىك كورەيا، موڭعوليا، قىرعىزستان، تايلاند جانە قازاقستان مەملەكەتتەرى بار.

چەمپيونات بالالار مەن جاسوسپىرىمدەر بياتلونىن دامىتۋ باعدارلاماسى اياسىندا جانە 2023 -جىلى-ناۋرىز ايىندا قۇرىلعان ازيا بياتلون فەدەراتسياسىنىڭ قولداۋىمەن ۇيىمداستىرىلادى.

2025 -جىلى قىتايدا قىسقى ازيا ويىندارى جوسپارلانعانىن ەسكەرسەك، بۇل باسەكە جاس سپورتشىلار ءۇشىن حالىقارالىق تاجىريبە شەڭبەرىندە اسا قاجەت. جارىستىڭ تىكەلەي ترانسلياتسياسىن يۋتۋب جەلىسىندە «COP ZVS TV» ارناسى جۇرگىزەدى. كورەرمەندەر ءۇشىن كىرۋ تەگىن.

جارىس باعدارلاماسى:

12-ناۋرىز، سەيسەنبى- جەكە جارىس (youth men, youth women)

13-ناۋرىز، سارسەنبى- جەكە جارىس (junior men, junior women)

14-ناۋرىز، بەيسەنبى- سپرينت (youth men, youth women)

15-ناۋرىز، جۇما- سپرينت (junior men, junior women)

16-ناۋرىز، سەنبى- ءىز كەسۋ (youth men, youth women)

17-ناۋرىز، جەكسەنبى- ءىز كەسۋ (junior men, junior women)

اۆتور

كۇنسۇلتان وتارباي