اقمارال ءالنازاروۆا ۋاقىت بەلدەۋىن اۋىستىرۋ تۋرالى: كەز كەلگەن مەملەكەت بۇعان بارا بەرمەيدى
استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا ۋاقىت بەلدەۋىن اۋىستىرۋعا بايلانىستى پىكىر ءبىلدىردى.
«وسى ماسەلەگە بايلانىستى قازاقستانداعى، حالىقارالىق قانداي تاجىريبەلەر بار، سولاردىڭ ءبارىن زەرتتەدىك. بۇل جەردە ءبىزدىڭ ۇلكەن عىلىمي ورتالىقتار بار - ادام فيزيولوگياسى ورتالىعى، استروفيزيكا ورتالىعى دەگەندەي. نەگىزگى شەشىم عىلىمي تۇرعىدان زەردەلەنىپ، دالەلدەنگەن اقپاراتتارعا سۇيەنە وتىرىپ، شەشىم جاسالدى. ءبىز كۇتىپ وتىرعان الداعى ناتيجە حالىقتىڭ دەنساۋلىعىنا وڭ اسەرىن تيگىزەدى دەپ بىلەمىن. سەبەبى ادامداردىڭ عاسىرلار بويى قالىپتاسقان بيولوگيالىق ساعاتتارى بار. سول بيولوگيالىق ساعات پەن اكىمشىلىك ساتتىڭ ەكەۋىن تەڭەستىرۋگە بارلىق مەملەكەت بارا بەرمەيدى»، - دەدى ول ءبىلىم سالاسىن دامىتۋعا ارنالعان القا ءماجىلىسىنىڭ الدىندا.
ءمينيستردىڭ سوزىنشە، بۇل ۋاقىتتىڭ اۋىسۋى ادام دەنساۋلىعىنا وڭ اسەر ەتۋ كەرەك.
«بۇل ءبىر جاعىنان ازاماتتاردىڭ دەنساۋلىعىنا پايدالى اسەر ەتكەنىمەن، كەيبىر جەرلەردە ەكونوميكالىق تۇرعىدان، جارىققا بايلانىستى كەيبىر وزگەرىستەر كەلۋى مۇمكىن. ءبىراق ەڭ باستىسى، مەملەكەتىمىز وسى ماسەلەنى حالىقتىڭ دەنساۋلىعىن جاقسارتۋ ءۇشىن قابىلداپ وتىر. سوندىقتان مەملەكەتتىڭ بۇل شەشىمىن قولدايمىن»، - دەدى اقمارال ءالنازاروۆا.
