اقشادا قانشا ميكروب بار؟
استانا. KAZINFORM - اقشا - كۇندەلىكتى ومىردەگى قولدان-قولعا كوپ جۇرەتىن زاتتىڭ ءبىرى. ءبىر عانا بانكنوتا ءبىر ايدىڭ ىشىندە جۇزدەگەن ادامنىڭ قولىنان ءوتىپ، قالتادا، ءامياندا، دۇكەن سورەسىندە، بانكوماتتا جۇرەدى. سوندىقتان ونىڭ بەتىندە ءتۇرلى ميكرواعزالاردىڭ جينالۋى قالىپتى قۇبىلىس، دەپ حابارلايدى science.mail.ru.
عالىمدار اقشا بەتتەرىنەن تەرىدە ءومىر سۇرەتىن زيانسىز باكتەريالاردى دا، شارتتى تۇردە قاۋىپتى ميكروورگانيزمدەردى دە انىقتاعان. ولاردىڭ قاتارىندا ستافيلوكوكك، ىشەك تاياقشاسى، ەنتەروكوكك سياقتى باكتەريالار بار. كەي جاعدايدا ساڭىراۋقۇلاقتار مەن ۆيرۋستار دا كەزدەسەدى. زەرتحانالىق تاجىريبەلەردە تۇماۋ ۆيرۋسىنىڭ بانكنوت بەتىندە 17 كۇنگە دەيىن، ال كوروناۆيرۋستاردىڭ بولمە تەمپەراتۋراسىندا 3-4 كۇن ساقتالا الاتىنى بايقالعان.
الايدا ماماندار ءبىر ماڭىزدى جايتتى ەسكەرتەدى: ميكروبتىڭ بولۋى مىندەتتى تۇردە اۋرۋ جۇقتىرادى دەگەن ءسوز ەمەس. ادام اۋىرۋى ءۇشىن قوزدىرعىش ءتىرى بولۋى، ونىڭ مولشەرى جەتكىلىكتى بولۋى جانە اعزاعا ەنۋ جولى بولۋى كەرەك.
نەلىكتەن قاعاز اقشا «لاس» سانالادى؟
قاعاز بانكنوتانىڭ قۇرىلىمىنداعى تسەلليۋلوزا تالشىقتارى ىلعالدى، تەر بولشەكتەرىن، مايدى جانە شاڭدى وزىنە سىڭىرەدى. مۇنداي ورتا باكتەريالاردىڭ ساقتالۋىنا قولايلى.
ال تيىندار ميكروبتارعا ونشا ىڭعايلى ەمەس. سەبەبى ولاردىڭ قۇرامىنداعى مىس، نيكەل، جەز سياقتى مەتالدار باكتەريالاردىڭ قابىعىن زاقىمدايتىن قاسيەتكە يە. دەگەنمەن ىلعالدى ورتادا مونەتالاردىڭ وزىندە دە باكتەريالار ەكى ايعا دەيىن ساقتالۋى مۇمكىن.
قورقۋ كەرەك پە؟
مامانداردىڭ ايتۋىنشا، دەنى ساۋ ادام ءۇشىن قولما- قول اقشادان ينفەكتسيا جۇقتىرۋ قاۋپى وتە تومەن. ادام تەرىسى مەن يممۋندىق جۇيەسى كوپتەگەن ميكرواعزالاردان قورعاي الادى. ءبىراق يممۋنيتەتى ءالسىز ادامدارعا، كىشكەنتاي بالالارعا جانە قولىندا اشىق جاراسى بارلارعا ساق بولعان ءجون.
اسىرەسە، اقشانى ۇستاعان سوڭ قولدى جۋماي تاماق ىشپەۋ؛ بەتكە، كوزگە، اۋىزعا قول تيگىزبەۋ؛ قاجەت جاعدايدا انتيسەپتيك قولدانۋ ماڭىزدى.
قوعامدىق تاماقتانۋ، مەديتسينا جانە كاسسا قىزمەتكەرلەرى ءۇشىن گيگيەنا تالاپتارى ءتىپتى قاتاڭ بولۋى كەرەك. زەرتتەۋلەرگە سايكەس، ەت بازارلارىنداعى، اۋرۋحانالارداعى جانە ساۋدا ورىندارىنداعى اقشالاردا پاتوگەندەر جيىرەك كەزدەسەدى.
قاۋىپتى قالاي سەيىلتۋگە بولادى؟
دارىگەرلەر بىرنەشە قاراپايىم ەرەجەنى ۇسىنادى: قولما-قول اقشا ۇستاعان سوڭ قول جۋۋ؛ سۋ بولماعان جاعدايدا سپيرتتىك انتيسەپتيك پايدالانۋ؛ اقشانى ازىق-تۇلىكتەن بولەك ساقتاۋ؛ بەتكە قول تيگىزبەۋ؛ مۇمكىن بولسا، بايلانىسسىز تولەم ءتۇرىن قولدانۋ.
قازىر كوپتەگەن ەلدەر گيگيەنالىق تۇرعىدان پوليمەرلى بانكنوتتارعا كوشىپ جاتىر. مۇنداي اقشالار ىلعالدى از سىڭىرەدى جانە تازالاۋ وڭاي. اۆستراليا، كانادا، ۇلى بريتانيانىڭ كەي ايماقتارىندا وسىنداي جۇيە ەنگىزىلگەن.
