قازاقستان مەن موڭعوليا مەديا سالاداعى ىنتىماقتاستىقتى نىعايتادى

قۇجاتقا ق ر پرەزيدەنتى تەلەراديوكەشەنى ديرەكتورى راۋشان قاجىبايەۆا جانە MNB باس ديرەكتورى گەرەل گانحۋياگ قول قويدى.

مەموراندۋم مەدياسالاداعى ارىپتەستىكتى دامىتۋعا نەگىز قالايدى جانە بۇقارالىق اقپارات قۇرالدارىن دامىتۋدىڭ نەگىزگى باعىتتارى بويىنشا ءوزارا ءىس-قيمىلدى كوزدەيدى.

تاراپتار مەدياكونتەنت الماسۋ، بىرلەسكەن جوبالاردى جۇزەگە اسىرۋ، كاسىبي تاجىريبە الماسۋ، سونداي-اق مامانداردىڭ بىلىكتىلىگىن ارتتىرۋ جانە تاعىلىمدامالار ۇيىمداستىرۋ بويىنشا ىنتىماقتاستىقتى نىعايتۋعا كەلىستى. سونىمەن قاتار مەدياونىمدەردى ۇلتتىق جانە حالىقارالىق دەڭگەيدە ىلگەرىلەتۋ ماسەلەلەرى قامتىلعان.

قۇجاتتا زاماناۋي سيفرلىق فورماتتاردى دامىتۋعا ەرەكشە نازار اۋدارىلعان. اتاپ ايتقاندا، ونلاين-پلاتفورمالار، الەۋمەتتىك جەلىلەر جانە مۋلتيمەديالىق ونىمدەر سالاسىنداعى ءوزارا ءىس-قيمىلدى كەڭەيتۋ كوزدەلگەن.

سونىمەن قاتار قۇجاتتا ەكى ەلدىڭ تۋريستىك، مادەني جانە ەكونوميكالىق الەۋەتىن تانىتۋعا باعىتتالعان ورتاق مەدياجوبالارعا ەرەكشە ءمان بەرىلگەن. وعان قوسا، ونلاين-پلاتفورمالار، الەۋمەتتىك جەلىلەر مەن مۋلتيمەديالىق ونىمدەردى قامتيتىن زاماناۋي سيفرلىق فورماتتار بويىنشا ىنتىماقتاستىقتى دامىتۋ قاراستىرىلعان.

انىقتاما ءۇشىن:

ق ر پرەزيدەنتى تەلەراديوكەشەنى - مەملەكەت باسشىسىنىڭ قىزمەتىن اقپاراتتىق تۇرعىدا قامتاماسىز ەتەتىن ءىرى مەدياقۇرىلىم. ونىڭ قۇرامىنا «Jibek Joly» تەلەارناسى مەن راديوسى، دەرەكتى كينو ورتالىعى، سونداي-اق التى تىلدە اقپارات تاراتاتىن «Kazinform» حالىقارالىق اقپارات اگەنتتىگى كىرەدى.

ال موڭعوليانىڭ ۇلتتىق قوعامدىق راديو جانە تەلەديدارى (MNB) - ەلدەگى جالعىز قوعامدىق حابار تاراتۋشى ءارى ەڭ ءىرى مەدياكومپانيا. ونىڭ قۇرامىندا التى تەلەارنا، ونىڭ ىشىندە تاۋلىك بويى حابار تاراتاتىن MNB News اقپاراتتىق ارناسى، سونداي-اق ءتورت راديو ستانسيا بار. سونىڭ ىشىندە جەتى تىلدە حابار تاراتاتىن «موڭعوليا داۋىسى» راديوسى جۇمىس ىستەيدى. بۇدان بولەك، كومپانيانىڭ جەكەلەگەن باعدارلامالارى قازاق تىلىندە دە دايىندالادى.