اقپاننىڭ سوڭىندا وڭتۇستىك وڭىرلەردە تاسقىن بەلگىلەرى بايقالۋى مۇمكىن – ت ج م
استانا. KAZINFORM - توتەنشە جاعدايلار ءمينيسترى شىڭعىس ءارىنوۆ اقپان ايىنىڭ اياعىندا وڭتۇستىك وڭىرلەردە تاسقىن بەلگىلەرى بايقالۋى مۇمكىن ەكەنىن ايتتى.
«بىلتىر جەلتوقساندا جاۋىن- شاشىن كوپ بولدى. قار تۇسكەن جوق دەسە دە بولادى. وسى ىلعالدىڭ ءبارى جەرگە ءسىڭدى جانە كەنەت تاسقىن كورىنىستەرى بولۋى مۇمكىن دەپ توپشىلايمىز. وڭتۇستىك وڭىرلەردە اقپاننىڭ اياعىندا، ناۋرىزدىڭ باسىندا سولتۇستىك وڭىرلەردە دەپ بولجاپ وتىرمىز. جەرگىلىكتى باسشىلارمەن، اكىمدەردىڭ جاۋاپتى ورىنباسارلارىمەن بايلانىستامىز. قالعانىن كوكتەمدە كورەمىز»، - دەدى ول.
مينيسترلىك ماماندارى بۇل جاۋاپقا قوسىمشا «قازگيدرومەتتىڭ» بولجامدارىن جاريا ەتتى.
اتالعان بولجام بويىنشا تاسقىن قاۋپى كۇردەلى وڭىرلەردىڭ قاتارىندا اقمولا، اقتوبە، الماتى، اتىراۋ، شىعىس قازاقستان، باتىس قازاقستان، قاراعاندى، قوستاناي، سولتۇستىك قازاقستان، تۇركىستان، اباي، ۇلىتاۋ وبلىستارى كىرىپ وتىر.
