اقپان ايىنان باستاپ بەنزين، ديزەل، سۇيىتىلعان گاز باعاسى وسەدى - ەنەرگەتيكا ءمينيسترى
استانا. KAZINFORM - ەنەرگەتيكا ءمينيسترى الماسادام ساتقاليەۆ ۇكىمەتتىڭ كەڭەيتىلگەن وتىرىسىنان كەيىن وتكەن باسپا ءسوز ءماسليحاتىندا جانارماي باعاسى كەلەشەكتە قالاي رەتتەلەتىنىن ايتتى.

- مۇناي ونىمدەرىنىڭ باعاسىنىڭ ءوسۋى تۋرالى ايتساق، بۇعان دەيىن پرەزيدەنت جانىنداعى كەڭەس شەشىم قابىلداپ قويدى. جانار-جاعارماي عانا ەمەس، سۇيىتىلعان مۇناي گازىنىڭ باعاسىن دا كەزەڭ- كەزەڭمەن ءوسىرۋ تۋرالى شەشىم بار. سونداي-اق، تاۋارلىق گاز بويىنشا دا باعانىڭ وسۋىمەن بايلانىستى بەلگىلى ءبىر مەجەلەر بار.
مۇنداعى باستى ۇستانىم باعانى باقىلاۋدىڭ نورماتيۆتىك جانە اكىمشىلىك شارالاردى ۇكىمەتتىڭ قولىندا قالدىرۋعا باعىتتالعان. ياعني، اتالعان الەۋمەتتىك ماڭىزى بار تاۋارلار باعاسىنىڭ كۇرت ءوسۋى بولمايدى، - دەدى ول.
مينيستر جانار-جاعارماي مەن سۇيىتىلعان گازدىڭ باعاسىن اقپان ايىنان باستاپ ءوسىرۋدى جوسپارلاپ وتىرعاندارىن ءمالىم ەتتى.
- تاۋارلىق گازدىڭ باعاسى بيىلعى جازعا قاراي بىرتىندەپ وسەدى دەپ وتىرمىز، - دەدى ۆەدومستۆو باسشىسى.
سونداي-اق الماسادام ساتقاليەۆ سۇيىتىلعان گازدىڭ باعاسى 98 تەڭگەدەن ارى قىمباتتامايدى دەگەن مالىمەت كەلتىردى.
- بىلتىر باعا دياپازونىن 54-55 تەڭگە بولسا، 59-90 تەڭگە اراسىندا بولادى. ول ەندى وڭىرلەرگە بايلانىستى. ەڭ جوعارعى دياپازون وڭىرلەردە 64 تەڭگەدەن 98 تەڭگەگە دەيىن بولادى دەپ وتىرمىز، - دەدى ەنەرگەتيكا ءمينيسترى.
بۇعان دەيىن ەنەرگەتيكا ءمينيسترى الماسادام ساتقاليەۆ ەكىنشى ا ە س سالۋعا قايتادان رەفەرەندۋم وتكىزىلمەيتىنى تۋرالى ايتقان ەدى.
ەسكە سالساق، سەرىك جۇمانعارين ۇكىمەتتىڭ كەڭەيتىلگەن وتىرىسىنان كەيىن وتكەن باسپا ءسوز ءماسليحاتىندا ۇكىمەت قوسىلعان قۇن سالىعىن 20 پايىز كوتەرۋ دەگەن شەشىمگە ءالى ناقتى كەلگەن جوق ەكەنىن ايتقان بولاتىن.