اق ۇيگە جاقىن ماڭدا اتىس بولدى

NBC News ارناسىنىڭ حابارلاۋىنشا، ءبىر ادامنىڭ ءومىرىن قيىپ، تاعى ءتورت ادام جارالانعان اتىسقا ۇزاق ۋاقىتقا سوزىلعان قارجىلىق داۋ سەبەپشى بولعان، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

كۇدىكتى رەتىندە 55 جاستاعى دوكتور مەتت لامبەرت اتالىپ وتىر. پوليتسيا ونىڭ دەنەسىن جەتى قاباتتى ەليتالىق «Metropole» تۇرعىن ءۇي كەشەنىنىڭ جەتىنشى قاباتىنداعى پاتەرىنەن تاپتى. ول ءوزىن ءوزى اتىپ قويعان دەگەن بولجام ايتىلىپ وتىر.

لامبەرت بۇعان دەيىن تاڭعى ساعات 8:30 دا Vida فيتنەس ورتالىعىنا ونىڭ 46 جاستاعى باسقارۋشىسى دجەيمس ستيۋارتتى اتۋ ءۇشىن كەلگەن. سپورتزالعا كەلگەن باسقا ەشكىمگە تيىسپەگەن. سودان كەيىن لامبەرت ۇيىنە ورالىپ، ىشكە قامالىپ العان. حابارلارعا قاراعاندا، كۇدىكتى ءبىرىنشى قاباتتاعى ادامدارعا ءوز پاتەرىنىڭ بالكونىنان وق جاۋدىرىپ، دالىزگە دە وق اتقان، ارتىنشا ءوزىن-ءوزى اتىپ ولتىرگەن. جارالانعان ءتورت ادامنىڭ بىرەۋىنىڭ جاعدايى اۋىر، قالعان ءۇش ادامنىڭ ومىرىنە قاۋىپ ءتونىپ تۇرعان جوق.

دارىگەر لامبەرت، Metropole كوندومينيۋم قاۋىمداستىعى جانە EJF Real Estate Services Inc. باسقارۋشى كومپانياسى اراسىنداعى پاتەردەن سۋ اعىپ كەتۋىنە بايلانىستى تۋىنداعان داۋ، ۇزاققا سوزىلعان جانجالعا ۇلاسقان. لامبەرت پاتەر 2024-جىلى عيماراتتىڭ قاسبەتىن جوندەۋ كەزىندە زاقىمدالعانىن جانە مامانداردىڭ تەكسەرۋى ماسەلەنى شەشە الماعانىن مالىمدەگەن.

لامبەرت زالالدى وتەۋدى جانە پاتەردى جوندەۋ قۇنىن تولەۋدى تالاپ ەتتى. ويتكەنى بۇل وعان 300000 دوللاردان استام شىعىن اكەلگەن. ىستەگى نەگىزگى كۋاگەر مارقۇم ستيۋارت ەدى. 2025-جىلدىڭ جەلتوقسانىندا Metropole قاۋىمداستىعى ىلعالدىڭ كوپ بولۋىنا Vida فيتنەس ورتالىعىن باسقاراتىن Urban Adventures كومپانياسىن كىنالاپ، قارسى شاعىم تۇسىرگەن.

پوليتسيانىڭ مالىمەتىنشە، لامبەرتتىڭ پاتەرىنەن تىركەلمەگەن ءۇش قارۋ: تاپانشا، مىلتىق جانە اڭشى مىلتىعى تابىلدى. تەرگەۋ ءجۇرىپ جاتىر.

بۇعان دەيىن ۆاشينگتونداعى كاپيتولي عيماراتىنىڭ ماڭىندا بولعان توبەلەس كەزىندە ۇلتتىق گۆارديا ساربازىنا وق اتىلعانى جايلى حابارلاعان ەدىك.