اق ءۇي Meta عا قىسىم جاسادى - مارك سۋكەربەرگ
استانا. قازاقپارات - Meta ءتوراعاسى جانە باس ديرەكتورى مارك سۋكەربەرگتىڭ مالىمدەۋىنشە، بايدەن اكىمشىلىگى ونىڭ كومپانياسىنا قىسىم جاساپ، پاندەميا كەزىندە covid-19 ۆيرۋسىنا قاتىستى كەيبىر كونتەنتكە سەنزۋرا قويۋدى تالاپ ەتكەن، دەپ حابارلايدى Financial Times.
وكىلدەر پالاتاسى زاڭ كوميتەتىنىڭ ءتوراعاسى دجيم دجوردانعا جولداعان حاتىندا سۋكەربەرگ بايدەن اكىمشىلىگىنىڭ جوعارى لاۋازىمدى مۇشەلەرى Meta كومانداسىنا Covid-19-عا قاتىستى كەيبىر ماتەريالداردى، سونىڭ ىشىندە ءازىل مەن ساتيرانى سەنزۋرالاۋ تالابىمەن «بىرنەشە رەت قىسىم كورسەتكەنىن» جازدى.
«ۇكىمەت تاراپىنان جاسالعان قىسىم قاتە بولدى دەپ ەسەپتەيمىن جانە بۇل تۋرالى كەسىپ ايتپاعانىمىزعا وكىنەمىن. مەن كەز كەلگەن اكىمشىلىكتىڭ قىسىمىمەن كونتەنت ستاندارتتارىمىزدى بۇزباۋىمىز كەرەك دەپ سەنەمىن، ەگەر مۇنداي جاعداي قايتالانسا، ءبىز قارسى تۇرۋعا دايىنبىز»، - دەپ جازدى ول كوميتەتتىڭ X الەۋمەتتىك جەلىسىندە جاريالاعان حاتىندا.
سۋكەربەرگ سونىمەن قاتار ءوزىنىڭ Chan Zuckerberg Initiative ۇيىمى ارقىلى سايلاۋ ينفراقۇرىلىمىن قولداۋعا جاڭا جارنا قوسپايتىنىن راستادى.
«مەنىڭ ماقساتىم - بەيتاراپ بولۋ جانە قانداي دا ءبىر ءرول ويناماۋ نەمەسە ءتىپتى ءرولدى ويناپ جاتقانداي اسەر قالدىرماۋ. سوندىقتان مەن وسى سايلاۋ سيكلىنە ۇلەس قوسۋدى جوسپارلاپ وتىرعان جوقپىن»، - دەپ جازدى سۋكەربەرگ.
بۇل اق ءۇيدىڭ اقپارات تاراتۋ ىسىنە ىقپال ەتۋى جونىندەگى سۋكەربەرگ تاراپىنان جاسالعان كۇتپەگەن مالىمدەمە بولدى. سونداي-اق قاراشادا وتەتىن سايلاۋ الدىندا دەموكراتتارعا جاسالعان ەسكەرتۋ بولاتىن.
«ءبىز قاۋىپتى پاندەميامەن بەتپە- بەت كەلگەندە بۇل بۇل اكىمشىلىك قوعام دەنساۋلىعى مەن قاۋىپسىزدىگىن قولداپ وتىردى. بىزدىڭشە، تەحنولوگيالىق كومپانيالار اقپارات تاراتۋ بويىنشا تاۋەلسىز شەشىم قابىلداعاندا ول شەشىمنىڭ سالدارى امەريكا حالقى ءۇشىن قانداي بولاتىنىن ويلانۋ كەرەك»، - دەپ مالىمدەدى دۇيسەنبى كۇنى اق ءۇيدىڭ وكىلى.
بۇل وقيعا ميللياردەر يلون ماسكتىڭ پلاتفورمالار ءسوز بوستاندىعىنا باسىمدىق بەرۋ كەرەك پا، الدە ونلاين قاۋىپسىزدىك ماڭىزدى ما دەگەن ساۋالىنان كەيىن بولىپ جاتىر.
وسىعان دەيىن يلون ماسكتىڭ ترامپتى قولداۋعا ايىنا 45 ميلليون دوللار بەرگەلى جاتقانىن جازدىق.
