اق باس سيىر مەن بايىستىڭ ءىزباسارلارى قايدا - ا ش م جاۋابى

استانا. KAZINFORM - مال تۇقىمىن اسىلداندىرۋ دەگەندە ويعا قازاقتىڭ اق باس سيىرى، ەدىلباي مەن بايىس قويى عانا كەلەدى. ونىڭ ءبارى كەڭەس زامانىنداعى عىلىمنىڭ جەتىستىگى دەۋگە بولادى. تاۋەلسىزدىك جىلدارىندا نەگە ءتول تۇقىم دەپ ايتۋعا تۇراتىن جاڭا مال ءناسىلى پايدا بولعان جوق؟ اۋىل شارۋاشىلىعى مينيسترلىگى Kazinform ساۋالىنا جاۋاپ جولدادى.

- 2021-2023 -جىلدارعا مال شارۋاشىلىعىنداعى عىلىمي باعدارلامالاردى قارجىلاندىرۋ اياسىندا كوپتەگەن عىلىمي جۇمىس جۇرگىزىلگەن. اتاپ ايتساق، قازاق مال شارۋاشىلىعى جانە جەمشوپ ءوندىرۋ عىلىمي-زەرتتەۋ ينستيتۋتى «قازاقتىڭ جىلقىسىنىڭ اداي ءتيپى «راتتورى-60» زاۋىتتىق ايعىرىنىڭ اتالىق جەلىسىن شىعارۋ بويىنشا جۇمىستار جۇرگىزدى. سونىڭ ناتيجەسىندە 2023 -جىلعى 29-جەلتوقساندا ق ر ادىلەت مينيسترلىگى جانىنداعى ۇلتتىق زياتكەرلىك مەنشىك ينستيتۋتى «اداي» جىلقى تۇقىمىنا پاتەنت بەردى. وسىلايشا، اداي جىلقىلارى رەسمي تۇردە دەربەس تۇقىم رەتىندە تانىلىپ، قر سەلەكتسيالىق جەتىستىكتەرىنىڭ مەملەكەتتىك تىزىلىمىندە تىركەلدى، - دەپ جازىلعان جاۋاپتا.

رەسمي مالىمەتتە اۋىل شارۋاشىلىعى سالاسىنداعى عىلىمدى دامىتۋ ءۇشىن ءۇش جىلعا 7 ميلليارد تەڭگەگە جۋىق قارجى قاراستىرىلعانى ايتىلعان.

- قازىرگى تاڭدا مينيسترلىك «عىلىمي زەرتتەۋلەردى جانە ءىس-شارالاردى باعدارلامالىق- نىسانالى قارجىلاندىرۋ» باعدارلاماسى بويىنشا 2024-2026 -جىلدارعا مال شارۋاشىلىعىنداعى عىلىمي باعدارلامالاردى قارجىلاندىرۋعا 6,9 ميلليارد تەڭگە قاراستىرىپ، كونكۋرستىق پروتسەدۋرالار وتكىزىلىپ جاتىر. اتالعان قارجى مال شارۋاشىلىعىنىڭ بارلىق باعىتتارىنا ءبولىنىپ وتىر، - دەلىنگەن رەسمي جاۋاپتا.

ەسكە سالساق، اداي تۇقىمدى قازاق جىلقىسىنىڭ ەرەكشە قاسيەتتەرى 2024 -جىلدىڭ باسىندا زاڭدى تۇردە بەكىتىلگەن بولاتىن.

اۆتور

ەسىمجان ناقتىباي