Apple قىتاي نارىعىنداعى ونىمدەرىنە جەرگىلىكتى ج ي مودەلدەرىن ەنگىزدى

كومپانيا قۇرىلعىلاردىڭ جەلىلىك قۇجاتتاماسىنا ج ي مودەلدەرىنىڭ تىركەۋ نومىرلەرىن ەنگىزگەن، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى جەرگىلىكتى ب ا ق- قا سىلتەمە جاساپ.

ق ح ر ونەركاسىپ جانە اقپاراتتىق تەحنولوگيالار مينيسترلىگىنىڭ جاڭارتىلعان قۇجاتتارىنا سايكەس، Apple- دىڭ العاشقى جينالمالى سمارتفونى iPhone Duo مەن وزگە دە قۇرىلعىلارىنىڭ تىزىلىمىنە ءۇش ج ي مودەلى ەنگىزىلگەن. ولاردىڭ قاتارىندا Apple كومپانياسىنىڭ Apple Intelligence جۇيەسى جانە Alibaba كومپانياسىنىڭ Tongyi Wanxiang پەن Tongyi Qianwen سەرۆيستەرى بار.

ج ي الگوريتمدەرىنىڭ تىركەلۋى Apple كومپانياسىنىڭ قىتاي نارىعىندا جاساندى ينتەللەكت سەرۆيستەرىن تولىققاندى ىسكە قوسۋىنا جول اشتى.

قىتايدىڭ رەتتەۋشى ورگاندارى بۇل وزگەرىستەردى 29-قىركۇيەكتە ماقۇلدادى. تىركەۋ نومىرلەرى جينالمالى iPhone Duo-مەن قاتار، iPhone 18 Pro ،iPhone 17 Pro جانە iPhone Air سمارتفوندارىنىڭ قۇجاتتارىنا دا ەنگىزىلدى.

شىلدە ايىندا قىتايدىڭ كيبەركەڭىستىك باسقارماسى Apple قۇرىلعىلارىندا Apple Intelligence جۇيەسىن پايدالانۋعا رۇقسات بەردى. ال alibaba كومپانياسى گەنەراتيۆتى فۋنكسيالار مەن مۋلتيمەديالىق كونتەنتتى وڭدەۋگە مۇمكىندىك بەرەتىن Qwen نەيروجەلىسىنىڭ Apple وپەراتسيالىق جۇيەلەرىنە ەنگىزىلگەنىن راستادى. بۇل مۇمكىندىكتەردى پايدالانۋ ءۇشىن قوسىمشا بوگدە قولدانبالاردى ورناتۋدىڭ قاجەتى جوق.

جينالمالى iPhone Duo سمارتفونىنىڭ قىتايداعى ساتىلىمى 23-قازاندا باستالادى. باستاپقى باعاسى - 15999 يۋان (شامامەن 2387 ا ق ش دوللارى).

بۇعان دەيىن Apple العاشقى بۇكتەلمەلى iPhone-ىن تانىستىرعانىن حابارلاعان ەدىك.