Apple كومپانياسىنىڭ باس ديرەكتورى قىزمەتىنەن كەتەدى
استانا. قازاقپارات - Apple كومپانياسى باسشىلىعىنىڭ جوسپارلى اۋىسۋى تۋرالى رەسمي تۇردە حابارلادى. قازىرگى باس ديرەكتور تيم كۋك ديرەكتورلار كەڭەسىنىڭ اتقارۋشى ءتوراعاسى قىزمەتىنە اۋىسادى، ونىڭ ورنىنا دجون تەرنۋس كەلەدى.
شەشىم 2026 -جىلعى 1- قىركۇيەكتە كۇشىنە ەنەدى. ديرەكتورلار كەڭەسى اپپاراتتىق قامتاماسىز ەتۋدى ازىرلەۋ جونىندەگى اعا ۆيتسە- پرەزيدەنت دجون تەرنۋستى كومپانيانىڭ باس اتقارۋشى ديرەكتورى قىزمەتىنە ءبىراۋىزدان بەكىتتى.
تيم كۋك جازدىڭ سوڭىنا دەيىن CEO مىندەتىن اتقارا بەرەدى، وكىلەتتىكتەردىڭ ءبىرقالىپتى بەرىلۋىن قامتاماسىز ەتۋ ءۇشىن تەرنۋسپەن تىعىز جۇمىس ىستەيدى. ودان كەيىن ول ديرەكتورلار كەڭەسىنىڭ اتقارۋشى ءتوراعاسى قىزمەتىن اتقارىپ، بۇكىل الەمدەگى مەملەكەتتىك قۇرىلىمدارمەن ءوزارا ءىس-قيمىلعا نازار اۋدارادى.
ەسكە سالا كەتەيىك، كۋك Apple كومپانياسىنا 1998-جىلى كەلگەن، 2011-جىلدان باستاپ ونى باسقارىپ كەلەدى. ونىڭ باسشىلىعى كەزەڭىندە Apple جاھاندىق نارىقتاعى پوزيتسياسىن ايتارلىقتاي نىعايتتى. كومپانيانىڭ نارىقتىق كاپيتاليزاتسياسى شامامەن 350 ميلليارد دوللاردان 4 تريلليون دوللارعا دەيىن ءوستى، ال بىلتىرعى جىلدىق تابىسى 416 ميلليارد دوللاردان استى.
ونىڭ جەتەكشىلىگىمەن Apple جاڭا ءونىم ساناتتارىن ىسكە قوستى، سونىڭ ىشىندە Apple Watch ،AirPods جانە Apple Vision Pro بار. سونداي-اق كومپانيا iCloud ، Apple Pay،Apple TV جانە Apple Music سياقتى سەرۆيستىك باعىتتى بەلسەندى دامىتتى. بۇگىندە بۇل قىزمەتتەر كومپانياعا جىلىنا 100 ميلليارد دوللاردان استام تابىس اكەلەدى.
دجون تەرنۋس Apple كومپانياسىندا 2001-جىلدان بەرى جۇمىس ىستەيدى. ول 2021 -جىلى اپپاراتتىق ينجەنەريا جونىندەگى اعا ۆيتسە- پرەزيدەنت رەتىندە جوعارى باسشىلىق قۇرامىنا كىردى.
تەرنۋس ءوز مانسابىندا iPhone ،Mac ،iPad جانە Apple Watch سياقتى ءونىم جەلىلەرىنىڭ دامۋىن باسقاردى. سونداي-اق AirPods جانە iPhone 17 سەرياسى، سونىڭ ىشىندە Pro ،Pro Max جانە iPhone Air سياقتى جاڭا مودەلدەردىڭ ىسكە قوسىلۋىنا قاتىسقان.
تەرنۋس ونىمدەردىڭ سەنىمدىلىگى مەن ەكولوگيالىق تۇراقتىلىعىن ارتتىرۋعا ەرەكشە كوڭىل ءبولدى. ونىڭ جەتەكشىلىگىمەن قايتا وڭدەلگەن اليۋميني، 3D باسىپ شىعارعان تيتان سياقتى جاڭا ماتەريالدار ەنگىزىلىپ، قۇرىلعىلاردىڭ جوندەۋگە جارامدىلىعى جاقسارتىلدى.
ەسكە سالا كەتەيىك، Apple الەمدەگى ەڭ قىمبات برەند اتانعان بولاتىن.
