Apple كومپانياسى Siri تىڭشىلىقتارى ءىسى بويىنشا سوتقا 95 ميلليون دوللار تولەيدى
استانا. قازاقپارات - Apple كومپانياسى Siri داۋىستىق كومەكشىسى پايدالانۋشىنىڭ قۇپيالىلىعىن بۇزدى دەگەن ايىپپەن توپتىق شاعىمدى رەتتەۋ ءۇشىن 95 ميلليون دوللار تولەۋگە كەلىستى.
Fox Business مالىمەتىنشە، Apple ونىمدەرى Siri داۋىستىق كومەكشىسىن بايقاۋسىزدا ىسكە قوسقاننان كەيىن جەكە سويلەسۋلەردى ۇنەمى جازىپ الاتىنىن مالىمدەگەن موبيلدى قۇرىلعى يەلەرىنىڭ شاعىمى كاليفورنيانىڭ وكلەند شتاتىنداعى فەدەرالدى سوتىنا بەرىلدى.
سونداي-اق، سوتتا اڭگىمەلەردىڭ مازمۇنى ءۇشىنشى تۇلعالارعا، سونىڭ ىشىندە كەيبىر پايدالانۋشىلاردىڭ سويلەسۋلەرىنە بەيىمدەلگەن جارناما بەرۋشىلەرگە قولجەتىمدى بولدى دەپ حابارلاندى.
ەكى تالاپكەر «Air Jordan» كروسسوۆكالارى مەن «Olive Garden» مەيرامحانالارى تۋرالى اڭگىمەلەسۋ كەيىننەن ولاردىڭ وسى برەندتەر تۋرالى ماقساتتى جارناما الۋىنا اكەلگەنىن مالىمدەدى.
تاعى ءبىر ادام دارىگەرمەن جەكە سويلەسكەننەن كەيىن فيرمالىق حيرۋرگيالىق ەمدەۋ تۋرالى حابارلاندىرۋ العانىنا شاعىمداندى.
95 ميلليون دوللارلىق وتەماقى - سوڭعى قارجى جىلىندا شامامەن 93,74 ميلليارد دوللار تازا كىرىسكە يە بولعان Apple كومپانياسىنىڭ 9 ساعاتتىق تابىسىنا تەڭ.
Forbes مالىمەتىنشە، توپتىق شاعىمدى Siri قولدايتىن Apple ونىمدەرىنىڭ يەلەرى ءتۇسىردى، وعان 2024 -جىلدىڭ 17 - قىركۇيەگى مەن 2024 -جىلدىڭ 31 - جەلتوقسانى ارالىعىندا ساتىپ الىنعان iPhone, iPad, Apple Watch, MacBook, iMac, HomePods, iPod touch جانە Apple TV قۇرىلعىلارى جاتادى.
Apple بۇعان دەيىن 2019 -جىلدىڭ تامىز ايىندا كەشىرىم سۇراپ، Siri باعدارلاماسىن ۋاقىتشا توقتاتقان بولاتىن. كومپانيا ساپانى باقىلاۋ ماقساتىندا پايدالانۋشىلاردىڭ شەشىمى بويىنشا اۋديو جازبالاردى ساقتاماۋمەن قوسا، وزگەرىستەر ەنگىزۋگە ۋادە بەردى.
2019 -جىلدىڭ قازان ايىنا قاراي «IOS 13.2» نۇسقاسىنىڭ شىعارىلىمىمەن Apple تۇتىنۋشىلارعا Siri تاريحىن جويۋعا جانە اۋديو جازبالارمەن بولىسۋدەن باس تارتۋعا مۇمكىندىك بەرەتىن پارامەترلەردى ەنگىزدى.
ادۆوكاتتار 28,5 ميلليون دوللارعا دەيىنگى گونورار، سونداي- اق سوت شىعىندارى ءۇشىن 1,1 ميلليون دوللار تالاپ ەتىپ وتىر.
كاليفورنيا شتاتىنداعى سان- حوسە فەدەرالدى سوتىندا Google داۋىستىق كومەكشىسى پايدالانۋشىلارىنىڭ اتىنان ۇقساس سوت ءىسى قارالىپ وتىر. Google ءىسى بويىنشا شاعىمدانۋشىلاردى Apple ىسىندەگىدەي زاڭ فيرمالارى ۇسىنعان.
تەحنولوگيالىق الپاۋىت Amazon دا ءوزىنىڭ داۋىستىق قىزمەتىنە قاتىستى وسىنداي ايىپتاۋلارعا تاپ بولدى.
