انتيرەكورد. ۇ ب ت-دان 1 بال جيناعان تۇلەك جەلى جۇلدىزىنا اينالدى

استانا. KAZINFORM - ەراسىل ۋاليەۆ ۇلتتىق ءبىرىڭعاي تەستىلەۋ ناتيجەسى بويىنشا 1 ۇپاي جيناعان.

ول بۇل تۋرالى ۆيدەونى TikTok-تاعى پاراقشاسىندا جاريالادى.

ەراسىل ۋاليەۆتىڭ ءوزى ونىڭ ۆيدەوسى جەلىدە تاراپ كەتىپ، پىكىر جازعاندار ءۇش توپقا بولىنگەنىن ايتتى.

@erasyl.ualievv Ай Ерасыл Ерасыл #1баллентерасыл #erasylualiev ♬ sonido original - smith_aske

كەيبىرى مەكتەپ تۇلەگىن سونشالىقتى «اقىماق» دەسە، ەندى ءبىرى نە دەگەن «اقىلدىسىڭ» دەگەن. ال ءۇشىنشى توپ وقۋشىنى «تەك ءبىر سۇراققا جاۋاپ بەرىپ، كەتىپ قالعان» دەپ توپشىلاپ وتىر.

كەيىنىرەك مەكتەپ تۇلەگى ۇ ب ت-دان نە سەبەپتى 1 بال العانىن ءتۇسىندىردى.

«قازىر 11-سىنىپ وقۋشىلارىنىڭ ءبارى «گرانتقا تۇسەمىز» دەپ، ۇ ب ت تاپسىرىپ جاتىر. جوعارى بال العاندار، ارينە، باس كيىمىن اسپانعا لاقتىرىپ قۋانىپ جاتىر دا، ال تومەن العاندار نە ىستەپ جاتىر؟ دەپرەسسيادا جاتىر. بىرەۋلەر ءتىپتى «ومىرىمە نۇكتە قويىلدى، ەندى نە ىستەيمىن؟» دەپ ويلاپ جاتىر، ءبىراق مەن سىزدەرگە ايتايىن: «ۇ ب ت- مەن ءومىر توقتاپ قالا ما؟» جوق. ارينە، جوق. نە ءۇشىن؟ مىسالى، امەريكانىڭ ەكس-پرەزيدەنتى دونالد ترامپ مەكتەپ كەزىندە ساباقتى دۇرىس وقىماپتى. سول سياقتى بيل گەيتس، ول دا دۇرىس وقىماعان. بارلىعىمىز ۇستاپ جۇرگەن تەلەفون - iPhone. Apple كومپانياسىنىڭ نەگىزىن قالاۋشى ستيۆ دجوبس تا ساباقتى دۇرىس وقىماعان. ونىڭ اتا-اناسى ءتىپتى ول بالانى ۋنيۆەرسيتەتكە جىبەرۋ ءۇشىن تولەپ، ارتىنان قۋعان، ءبىراق بالا ءبارىبىر «وقىمايمىن» دەپ، ءبىرىنشى سەسسيادان كەيىن «ۇشىپ»، كەتىپ قالعان عوي، ءبىراق ولار وقىماسا دا، ومىردە جەتىستىكتەرگە جەتە الدى. سول ءۇشىن سىزدەر ۋايىمداماڭىزدار. ومىردە جەتىستىككە جەتۋ ءۇشىن ۇ ب ت- نىڭ بالى ەشقانداي ءرول وينامايتىنىن دالەلدەگىم كەلىپ تۇر. سوندىقتان وزىمە بەرىلگەن مۇمكىندىكتى پايدالانىپ، الداعى ۋاقىتتا بارشا ادامعا «ۇ ب ت- نىڭ بالىنىڭ ارقاسىندا ەمەس، تۇراقتىلىق پەن ديستسيپلينانىڭ ارقاسىندا كوپ، بيىك-بيىك بەلەستەرگە قالاي جەتەتىنىمدى كورسەتپەكشىمىن»، - دەدى ول.

@erasyl.ualievv Білімсіз ешқайда бара алмаймыз #erasylualiev #1баллентерасыл ♬ оригинальный звук - Ерасыл Уалиев

ايتا كەتەيىك، ۇلتتىق تەستىلەۋ ورتالىعى قىزمەتكەرلەرى ۇلتتىق ءبىرىڭعاي تەستىلەۋ (ۇ ب ت) ناتيجەسى بويىنشا 1 بال جيناعان تۇلەك تۋرالى اقپاراتقا قاتىستى پىكىر ءبىلدىردى.

ۆەدومستۆو ەراسىل ۋاليەۆتىڭ ەكى رەت - 12 جانە 30-ماۋسىمدا الماتىدا تەستىلەۋدەن وتكەنىن ايتتى.

«12-ماۋسىمدا بۇل تەست تاپسىرۋشى 93 بال جينادى، 30-ماۋسىمدا ول 1 بال جينادى، ءبىراق ول تەستىلەۋدەن بار بولعانى 4 مينۋت وتكەنىن اتاپ وتكەن ءجون»، - دەپ ءتۇسىندىردى تەستىلەۋ ورتالىعى قىزمەتكەرلەرى.

ولار، سونداي-اق، تالاپكەرلەر گرانتتىق بايقاۋعا قاتىسۋ ءۇشىن نەگىزگى ۇ ب ت-دان ەكى سەرتيفيكاتتىڭ ءبىرىن تاڭداي الاتىنىن اتاپ ءوتتى.