انتيكور سىبايلاس جەمقورلىققا قارسى كۇرەس جونىندەگى ورگانداردىڭ حالىقارالىق قاۋىمداستىعىنا ەندى

Антикор
Фото: Антикор

استانا. KAZINFORM - بيىلعى 22-24-مامىر ارالىعىندا ق ر سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي باستاعان دەلەگاتسيا گونكونگتا ءوتىپ جاتقان «جەمقورلىققا قارسى كۇرەستىڭ جاڭا جولىن جوبالاۋ» اتتى 8-سيمپوزيۋمعا قاتىستى.

ءىس-شارا سىبايلاس جەمقورلىققا قارسى ورگاننىڭ - گونكونگتىڭ سىبايلاس جەمقورلىققا قارسى كۇرەس جونىندەگى تاۋەلسىز كوميسسياسىنىڭ قۇرىلعانىنا 50 جىل تولۋىنا ارنالعان. وعان الەمنىڭ 60 تان استام ەلىنىڭ حالىقارالىق ۇيىمدارى مەن سىبايلاس جەمقورلىققا قارسى ۆەدومستۆولارىنىڭ وكىلدەرى قاتىستى. سىبايلاس جەمقورلىققا قارسى ءىس-قيمىلداعى زاماناۋي سىن-قاتەرلەر، ىستەردى تەرگەۋ جانە جەمقورلىق تاۋەكەلدەرىن انىقتاۋ كەزىندە جاڭا اقپاراتتىق تەحنولوگيالار مەن جاساندى ينتەللەكتتى قولدانۋ، جەمقورلىققا قارسى ءبىلىم بەرۋ جانە اعارتۋ ماسەلەلەرى، جاستاردىڭ جەمقورلىققا قارسى ءىس-ارەكەتتەرگە تارتىلۋى تالقىلانىپ، جەمقورلىققا قارسى كۇرەستەگى وزىق تاجىريبەلەر تانىستىرىلدى.

«كونفەرەنسيا اياسىندا اگەنتتىك ءتوراعاسى ا. جۇماعالي گونكونگتىڭ سىبايلاس جەمقورلىققا قارسى كۇرەس جونىندەگى تاۋەلسىز كوميسسياسىنىڭ باسشىسى دەنني ۆۋ مىرزامەن كەزدەستى. ا. جۇماعالي اگەنتتىكتىڭ قىزمەتى جانە جەمقورلىققا قارسى ءىس-قيمىل بويىنشا قابىلدانىپ جاتقان شارالاردى تانىستىرىپ، ورگاننىڭ ب ۇ ۇ ە ق ب وڭىرلىك پلاتفورماسىن قۇرۋ جانە استانا قالاسىندا كونفەرەنسيا وتكىزۋ جونىندەگى باستامالارى تۋرالى ايتتى. كەزدەسۋ قورىتىندىسى بويىنشا ءوزارا تۇسىنىستىك تۋرالى مەموراندۋمعا قول قويىلدى. قۇجات قۇقىقتىق كومەك كورسەتۋ، اكتيۆتەردى قايتارۋ، ادامداردى ىزدەستىرۋ، بيۋجەت قاراجاتىن ماقساتتى پايدالانۋ مەن ساتىپ الۋ مونيتورينگى، جاساندى ينتەللەكتتى قوسا العاندا، سىبايلاس جەمقورلىققا قارسى كۇرەستە جاڭا تەحنولوگيالاردى ەنگىزۋ ماسەلەلەرىندە ارىپتەستىكتى نىعايتۋعا باعىتتالعان. سونداي-اق، كوميسسيانىڭ شاقىرۋى بويىنشا قازاقستان اگەنتتىگى سىبايلاس جەمقورلىققا قارسى كۇرەس جونىندەگى ورگانداردىڭ حالىقارالىق قاۋىمداستىعىنا رەسمي تۇردە ەندى»، - دەلىنگەن ۆەدومستۆو اقپاراتىندا.

بۇل ءوز كەزەگىندە شەتەلدىك ارىپتەستەرمەن ءوزارا ءىس-قيمىلدى ەداۋىر كەڭەيتۋگە مۇمكىندىك بەرەدى، وزىق تاجىريبە مەن ءبىلىم الماسۋعا ىقپال ەتەدى.

سونىمەن قاتار ا. جۇماعالي سيمپوزيۋم اياسىندا بۇۇ وكىلدەرىمەن، سونداي-اق مالايزيا، ساۋد ارابياسى، سينگاپۋر، وڭتۇستىك كورەيانىڭ جەمقورلىققا قارسى ۆەدومستۆولارىنىڭ باسشىلارىمەن كەزدەسىپ، الداعى ىنتىماقتاستىق پەرسپەكتيۆالارىن تالقىلادى.

سوڭعى جاڭالىقتار