انتيكور جەر سىلكىنىسى تۋرالى دابىل قاعۋ جۇيەسىنە جۇمسالاتىن شىعىندى تەكسەرمەك

Фото: elements.envato.com
Фото: elements.envato.com

انتيكور سەيسميكالىق قاۋىپتى وڭىرلەردە دابىل قاعۋ جۇيەسىنە جۇمسالاتىن شىعىندى زەردەلەۋگە كىرىستى، - دەپ حابارلايدى Massaget.kz ءتىلشىسى.

انتيكور ءتوراعاسى اسحات جۇماعالي مەملەكەت باسشىسىنىڭ جەر سىلكىنىسى تۋرالى حابارلاۋ جۇيەسىندەگى جاعدايدى زەردەلەۋ تۋرالى تاپسىرماسىن ىسكە اسىرۋ بويىنشا قۇرىلىمدىق جانە اۋماقتىق دەپارتامەنتتىڭ باسشىلارىمەن جەدەل كەڭەس وتكىزدى.

ەل پرەزيدەنتى الماتىداعى سەيسميكالىق قاۋىپسىزدىك ماسەلەلەرى جونىندەگى كەڭەس بارىسىندا باس پروكۋراتۋرامەن بىرلەسىپ، بيۋجەت قاراجاتىنىڭ قايدا جۇمسالعانىن انىقتاۋدى تاپسىردى.

وسىعان بايلانىستى اگەنتتىك قىزمەتكەرلەرىنىڭ ارنايى توبى شىعىستاردىڭ نەگىزدىلىگىن، مەملەكەتتىك ساتىپ الۋدى جۇرگىزۋدىڭ زاڭدىلىعىن زەردەلەۋگە كىرىستى.

انتيكوردىڭ ايماقتىق دەپارتامەنتى ءتيىستى اۋديتورلىق تەكسەرۋگە باستاماشى بولدى.

بۇدان باسقا، سىبايلاس جەمقورلىققا قارسى ۆەدومستۆونىڭ ءتوراعاسى بارلىق سەيسميكالىق قاۋىپتى وڭىرلەردە 2018-2023-جىلعا دەيىنگى كەزەڭدە سەيسميكالىق قاۋىپسىزدىكتى قامتاماسىز ەتۋگە بولىنگەن بيۋجەت قاراجاتىنىڭ جۇمسالۋىنا مونيتورينگ جۇرگىزۋدى تاپسىردى.

الماتىمەن قاتار ولارعا شىمكەنت قالاسى، سونداي-اق، اباي، جەتىسۋ، الماتى، شىعىس قازاقستان، جامبىل، قىزىلوردا جانە تۇركىستان وبلىستارى كىرەدى.

مونيتورينگ بارىسىندا باقىلاۋ-قاداعالاۋ ورگاندارىن تەكسەرۋ ناتيجەلەرىن، سوت-تەرگەۋ پراكتيكاسىن، عىلىمي ۇيىمداردىڭ قورىتىندىلارىن زەردەلەۋ جانە وسى وڭىرلەردە قۇرىلىس بارىسىندا سەيسميكالىق قاۋىپسىزدىك تالاپتارىن ساقتاۋ، ازاماتتاردىڭ وتىنىشتەرى مەن ب ا ق- تاعى جاريالانىمداردى تالداۋ كوزدەلگەن.

سىبايلاس جەمقورلىققا قارسى مونيتورينگ شەڭبەرىندە سەيسميكالىق قاۋىپسىزدىكتى قامتاماسىز ەتۋدىڭ باسقا دا ماسەلەلەرى زەردەلەنەتىن بولادى.

سوڭعى جاڭالىقتار