انتيكور جەمقورلىققا قارسى ءىس-قيمىل جونىندەگى حالىقارالىق ستاندارتتاردى ەنگىزۋدى جالعاستىرۋدا

استانا. قازاقپارات - 20-22-قاراشا ارالىعىندا استانادا قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىمەن بىرلەسىپ شىعىس ەۋروپا جانە ورتالىق ازيا ەلدەرى ءۇشىن ە ى د ۇ سىبايلاس جەمقورلىققا قارسى جەلىسى (ە ى د ۇ س ج ق ج) ۇيىمداستىرعان حالىقارالىق ساراپشىلارمەن كەزدەسۋ وتكىزىلدى.

ءىس-شارا ە ى د ۇ س ج ق ج ىسكە اسىراتىن جەمقورلىققا قارسى تاقىرىپتىق جوبا شەڭبەرىندە وتكىزىلدى، ونىڭ ماقساتى جەمقورلىق فاكتىلەرىن تەرگەۋدىڭ ساپاسى مەن تيىمدىلىگىن ارتتىرۋعا، سونداي-اق تاركىلەۋ شارالارى مەن سانكسيالاردى قولدانۋعا جاردەمدەسۋ بولىپ تابىلادى.

قازاقستان تاراپىنان تالقىلاۋعا پرەزيدەنت اكىمشىلىگىنىڭ، سىبايلاس جەمقورلىققا قارسى ءىس-قيمىل اگەنتتىگىنىڭ، پارلامەنتتىڭ، باس پروكۋراتۋرانىڭ جانە باسقا دا مەملەكەتتىك ورگانداردىڭ، پارلامەنتاريزم ينستيتۋتىنىڭ، «اتامەكەن» ۇ ك پ، سونداي-اق عىلىمي قوعامداستىقتىڭ وكىلدەرى قاتىستى.

اگەنتتىك ءتوراعاسى اسحات جۇماعالي كەزدەسۋدى ۇيىمداستىرعانى ءۇشىن ە ى د ۇ س ج ق ج باسشىسى ولگا ساۆرانعا جانە حالىقارالىق ساراپشىلارعا العىسىن ءبىلدىرىپ، قازاقستاننىڭ جەمقورلىققا قارسى ساياساتىن، ونىڭ ىشىندە ە ى د ۇ س ج ق ج سىبايلاس جەمقورلىققا قارسى كۇرەس جونىندەگى ستامبۋل ءىس-قيمىل جوسپارىنىڭ مونيتورينگىنىڭ 5- راۋندى شەڭبەرىندە ودان ءارى جەتىلدىرۋدىڭ ماڭىزدىلىعىن اتاپ ءوتتى.

قاتىسۋشىلارعا قۇتتىقتاۋ ءسوز سويلەگەن ا ق ش ەلشىسى د. روزەنبليۋم ەىدۇ بىرلەسكەن جوبالارى ارقىلى حالىقارالىق ىنتىماقتاستىق پەن ارىپتەستىكتىڭ نەگىزگى ءرولىن اتاپ ءوتىپ، قازاقستاننىڭ جەمقورلىققا قارسى رەفورمالارىنا قولداۋ ءبىلدىردى.

كەزدەسۋ بارىسىندا زاڭدى تۇلعالاردىڭ جەمقورلىق ءۇشىن قىلمىستىق جاۋاپتىلىعىن ەنگىزۋ ماسەلەلەرى، اكتيۆتەردى قايتارۋ، تاركىلەۋ جانە جەمقورلىق ىستەرى بويىنشا سانكسيالار ماسەلەلەرى بويىنشا زەرتتەۋ ناتيجەلەرى ساراپتامالىق تالقىلاۋدىڭ جەكەلەگەن تاقىرىپتارى بولدى.

ساراپشىلار حالىقارالىق تاجىريبەنى ۇسىنىپ، زاڭدى تۇلعالاردىڭ جاۋاپكەرشىلىگىن رەتتەۋ تاسىلدەرىمەن، ونىڭ ىشىندە قولدانىستاعى اكىمشىلىك شارالار جۇيەسىن، ونى كۇشەيتۋ جونىندەگى زاڭنامالىق باستامالارمەن، سونداي-اق بيزنەستىڭ اشىقتىعى مەن پاراساتتىلىعىن ارتتىرۋعا باعىتتالعان بالامالى شارالارمەن تانىستىردى.

قاتىسۋشىلار ەىدۇ ەلدەرىنىڭ وزىق تاجىريبەلەرىن جانە ۇلتتىق ەرەكشەلىكتەرىن ەسكەرە وتىرىپ، زاڭنامانى ودان ءارى جەتىلدىرۋدى تالقىلادى.

ارنايى كۇن سىبايلاس جەمقورلىققا قارسى كۇرەس جونىندەگى ستامبۋل ءىس-قيمىل جوسپارى شەڭبەرىندە قازاقستاندىق زاڭناما مونيتورينگىنىڭ 5-راۋندىن باعالاۋ ناتيجەلەرىن تانىستىرۋعا ارنالدى.

ە ى د ۇ ساراپشىلارى قازاقستاننىڭ جەمقورلىققا قارسى ءىس-قيمىل سالاسىنداعى، ونىڭ ىشىندە سىبايلاس جەمقورلىققا قارسى ساياساتتىڭ ينستيتۋتسيونالدىق نەگىزىن نىعايتۋ جانە قۇقىقتىق تەتىكتەردى دامىتۋ سياقتى باعىتتار بويىنشا ىلگەرىلەۋىن اتاپ ءوتتى.

سونىمەن قاتار، اقپاراتتاندىرۋشىلاردى قورعاۋدى، مەملەكەتتىك ساتىپ الۋلاردىڭ اشىقتىعىن، سونداي-اق سىبايلاس جەمقورلىققا قارسى ورگاننىڭ، پروكۋراتۋرا مەن سوت ورگاندارىنىڭ تاۋەلسىزدىگىن نىعايتۋدى قوسا العاندا، ودان ءارى جەتىلدىرۋدى تالاپ ەتەتىن اسپەكتىلەر ءبولىندى.

سونىمەن قاتار، ەىدۇ تاراپىنان ولاردىڭ ۇسىنىمدارىن ىسكە اسىرۋ بويىنشا تەحنيكالىق كومەك ماسەلەلەرى تالقىلاندى.

قازاقستاندىق تاراپ جەمقورلىققا قارسى ۇلتتىق ساياساتتى ىسكە اسىرۋ كەزىندە نەگىزگى باعىتتارىنىڭ ءبىرى حالىقارالىق ستاندارتتاردى ەنگىزۋ بولىپ تابىلاتىن تەرەڭ تالداۋ مەن ۇسىنىمدار ءۇشىن ساراپشىلارعا العىسىن ءبىلدىردى.

ە ى د ۇ- مەن بىرلەسكەن جۇمىس قازاقستاننىڭ قۇقىقتىق جۇيەسىن نىعايتۋ جانە قوعامنىڭ بيلىك ورگاندارىنا دەگەن سەنىمىن ارتتىرۋ جولىنداعى ماڭىزدى كەزەڭ بولىپ تابىلادى.