انتيكور ازىق-تۇلىك قاۋىپسىزدىگىنە بايلانىستى جەدەل كەڭەس وتكىزدى
سىبايلاس جەمقورلىققا قارسى ءىس-قيمىل اگەنتتىگىندە ازىق-تۇلىك قارىزدارىنا بولىنەتىن بيۋدجەت قاراجاتىن جۇمساۋ، اۋىل شارۋاشىلىعى ماقساتىنداعى جەرلەردى ءبولۋ، استىق قويمالارىن ۇستاۋ جانە اۋىل شارۋاشىلىعى سالاسىن سۋبسيديالاۋ ماسەلەلەرى بويىنشا كەڭەيتىلگەن جەدەل كەڭەس ءوتتى. بۇل تۋرالى Kaziform سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتىنە سىلتەمە جاساپ حابارلايدى.

«پرەزيدەنت سۋبسيديالار مەن اۋىل شارۋاشىلىعى جەرلەرىن ءبولۋ كەزىندە جەمقورلىققا قارسى ءىس-قيمىل جونىندەگى جۇمىستى جالعاستىرۋدى تاپسىردى. ءبىزدىڭ تاراپىمىزدان اۋىل شارۋاشىلىعىن دامىتۋعا بولىنەتىن بيۋدجەت قاراجاتىن سۇيەمەلدەۋ بويىنشا ءتيىستى رەاكتسيا قاجەت. سوندىقتان ارىپتەستەرىمىزدىڭ، اسىرەسە ازىق-تۇلىك بازالارى، استىق جانە باسقا دا اۋىل شارۋاشىلىعى ونىمدەرىن ساقتاۋعا ارنالعان ەليەۆاتورلار ورنالاسقان وڭىرلەرگە نازار اۋدارۋلارىڭىزدى سۇرايمىن»، - دەپ اتاپ ءوتتى اگەنتتىك ءتوراعاسى اسحات جۇماعالي.
ەستەرىڭىزگە سالا كەتەيىك، بۇعان دەيىن انتيكور اۋىل شارۋاشىلىعى سالاسىنداعى جەمقورلىق تاۋەكەلدەرىنە سىرتقى تالداۋ جۇرگىزگەن بولاتىن. جۇيەلى جەمقورلىق تاۋەكەلدەرى اشىلدى. اۋىل شارۋاشىلىعى مينيسترلىگىنە ولاردى جويۋ بويىنشا 170 ۇسىنىس بەرىلدى.
تالداۋ ناتيجەلەرى بويىنشا 2021-22 -جىلدارى سۋبسيديالاۋ سالاسىندا 130 قىلمىستىق ءىس تەرگەلدى. 96 ادام قىلمىستىق جاۋاپقا تارتىلدى. ونىڭ ىشىندە 18 ءتۇرلى دەڭگەيدەگى باسشىلار بار.
اسحات جۇماعاليدىڭ ايتۋىنشا، اگروونەركاسىپتىك كەشەندە مەملەكەتتىك قولداۋ شارالارىن ءتيىمدى پايدالانۋ ماسەلەسى وزەكتى بولىپ قالا بەرەدى. سوندىقتان اۋىل شارۋاشىلىعى سالاسى ەلىمىزدىڭ كوپتەگەن وڭىرلەرىندەگى جەمقورلىق تاۋەكەلدەرىنىڭ كارتاسىنا كىرەدى. اۋىل شارۋاشىلىعى تاۋار وندىرۋشىلەردىڭ قاجەتتىلىكتەرى ءۇشىن بولىنەتىن بيۋدجەتتىڭ نىسانالى ماقساتىنىڭ تيىمدىلىگىن قاداعالاۋ ماڭىزدى.
«بيۋدجەت قاراجاتىن يگەرۋ پروتسەستەرىنە مونيتورينگ جۇرگىزۋ قاجەت. اۋىل شارۋاشىلىعى تاۋار وندىرۋشىلەردىڭ قاجەتتىلىكتەرى ءۇشىن الىنعان اقشا ماقساتى بويىنشا پايدالانىلۋى ءتيىس»، - دەپ قورىتىندىلادى انتيكور باسشىسى.
سىبايلاس جەمقورلىققا قارسى قىزمەتتىڭ اۋماقتىق دەپارتامەنتتەرىنە ەلىمىزدىڭ ازىق-تۇلىك قاۋىپسىزدىگىن قامتاماسىز ەتۋگە باعىتتالعان بيۋدجەت قاراجاتىنىڭ جۇمسالۋىنا مۇقيات مونيتورينگ جۇرگىزۋ تاپسىرىلدى.