انتاليا اۋەجايىنداعى ەرەۋىلگە بايلانىستى رەيستەر كەشىگىپ جاتىر

 استانا. قازاقپارات - انتاليا اۋەجايىندا جۇمىسشىلاردىڭ ەرەۋىلىنە بايلانىستى حالىقارالىق جانە ىشكى رەيستەر كەشىككەن. كەيبىر ۇشاقتار ءبىر تاۋلىكتەن استام ۋاقىت بويى ۇشۋعا رۇقسات كۇتۋدە.

تۇركيانىڭ كۋرورتتىق ايماعىنىڭ تۋريزم سالاسى جاعاجاي ماۋسىمىنىڭ قىزعان شاعىندا اۋە ديسپەتچەرلەرىنىڭ ەرەۋىلىنە بايلانىستى داعدارىسقا ۇشىرادى.

انتاليا اۋەجايىنداعى نارازى قىزمەتكەرلەر جۇمىستان باس تارتىپ نەمەسە جۇمىس بەلسەندىلىگىن ادەيى ازايتىپ وتىر. وسى جاعدايدان سوڭ رەيستەر جوسپاردان تىس كەشىككەن جانە ۇشۋ ۋاقىتى اۋىسقان.

اۋەجاي قىزمەتكەرلەرى باسشىلىقتان جالاقىنى كوبەيتىپ، ەڭبەك جاعدايىن جاقسارتۋدى تالاپ ەتۋدە. قازىرگى ۋاقىتتا ولاردىڭ جۇمىسى ايتارلىقتاي باياۋلادى. بۇدان كەيىن رەيستەردىڭ ۋاقىتى كەيىنگى ىعىستىرىلىپ، ءتىپتى كەيبىرى ۇشپاي قالعان. بۇل جولاۋشىلاردىڭ، اسىرەسە دەمالۋشىلاردىڭ جاعدايىن قيىنداتىپ، اۋە كومپانيالارىن دا ۇلكەن قارجىلىق شىعىنعا باتىردى.

بۇل رەتتە كەيبىر تۇرىك باسىلىمدارى انتاليا اۋەجايىنداعى نارازىلىق اۋە كومپانيالارىنىڭ ءبىرى جولاۋشىلارعا الدىن الا ەسكەرتۋسىز گازيانتەپ، سامسۋن، ۆان جانە يزمير قالالارىنا رەيستەردى توقتاتقاننان كەيىن باستالعانىن جازدى.

جولاۋشىلاردىڭ اۋەجاي عيماراتىندا نارازىلىق بىلدىرە باستاعانى اتاپ ءوتىلدى. وسىدان كەيىن نارازى ادامدار اۋە كومپانياسىنىڭ كەڭسەسىنە باسىپ كىردى.

بۇعان دەيىن تۇركيانىڭ كولىك جانە ينفراقۇرىلىم مينيسترلىگى انتاليا اۋەجايىندا بيىلعى ماۋسىمدا بىلتىرعى اۋە قوزعالىسى رەكوردىنىڭ جاڭارعانىن مالىمدەگەن.

ۆەدومستۆونىڭ مالىمەتىنشە، كۋرورتتىق قالالىق اۋەجاي 199751 ادامدى قابىلداپ، 1175 رەيسكە قىزمەت كورسەتكەن. قىزمەتكەرلەردىڭ نارازىلىعى ءدال وسى كورسەتكىشتەرمەن بايلانىستى بولۋى مۇمكىن، بۇل ۇلكەن جۇمىس ۋاقىتىن كورسەتىپ وتىر.