انكاراداعى لاڭكەستىك ارەكەتتەن قانشا ادام كوز جۇمدى

انكارا. KAZINFORM - تۇركيانىڭ TUSAŞ اۋە-عارىش كومپانياسىنىڭ نىسانىنداعى لاڭكەستىك ارەكەت تۇركيانىڭ تۇراقتىلىعى مەن قورعانىس ونەركاسىبى سالاسىنداعى جەتىستىكتەرىنە نۇقسان كەلتىرۋدى كوزدەيدى، دەپ حابارلادى انادولى اگەنتتىگى.

بۇل تۋرالى تۇركيا پرەزيدەنتى رەجەپ تايىپ ەردوعان X الەۋمەتتىك جەلىسىندە تۇرىكتىڭ TUSAŞ اەروعارىشتىق كومپانياسىنىڭ نىساندارىنا جاسالعان شابۋىلعا قاتىستى پىكىر ءبىلدىردى.

مەملەكەت باسشىسى شابۋىلدان كەيىنگى العاشقى مينۋتتاردا تۇرىك قاۋىپسىزدىك كۇشتەرى شۇعىل ارەكەت ەتىپ، لاڭكەستەردى زالالسىزداندىرعانىن اتاپ ءوتتى.

- تۇركياعا قاراي سوزىلعان «لاس قولدار» بوگەلەدى. ءبىزدىڭ قاۋىپسىزدىگىمىزگە باعىتتالعان بىردە-ءبىر قۇرىلىم، تەرروريستىك ۇيىم نەمەسە زۇلىمدىق وشاعى ءوز ماقساتىنا جەتە المايدى، - دەپ جازدى تۇركيا باسشىسى.

ەردوعان تۇركيانىڭ لاڭكەستەر مەن ولاردىڭ سىبايلاستارىنان كەلەتىن قاۋىپتەردىڭ بارلىق تۇرىنە قارسى تاباندى ءارى جان-جاقتى كۇرەس جالعاسادى دەپ سەندىردى.

تۇركيا پرەزيدەنتى قازا بولعانداردىڭ رۋحى شات بولۋىن، جارالىلاردىڭ تەزىرەك ساۋىعىپ كەتۋىن تىلەدى.

تۇرىك باسشىسى تۇرىك قورعانىس ونەركاسىبىنىڭ لوكوموتيۆى جانە ماقتانىشى دەپ اتاعان TUSAŞ قىزمەتكەرلەرىنە دە قولداۋ ءبىلدىردى.

تۇركيانىڭ ىشكى ىستەر ءمينيسترى الي يەرليكايانىڭ مالىمدەسىندە تۇركيانىڭ TUSAŞ اەروعارىش كومپانياسىنىڭ نىسانىنداعى تەراكت سالدارىنان 4 ادام قازا تاۋىپ، تاعى 14 ادام جاراقات العانى ايتىلعان.

ءمينيستردىڭ ايتۋىنشا، شابۋىلدى جاساعان ەكى لاڭكەس زالالسىزداندىرىلعان. لاڭكەستەردىڭ ءبىرى ايەل.

ۆەدومستۆو باسشىسى جۇرتشىلىقتى بولعان وقيعاعا قاتىستى تەك رەسمي اقپارات كوزدەرىنەن الىنعان اقپاراتقا سەنۋگە شاقىردى.

تۇركيا استاناسىنىڭ كاحرامانقازان اۋدانىنداعى TUSAŞ مەكەمەسىندە بولعان لاڭكەستىك ارەكەت كەزىندە جاراقات العان 14 ادامنىڭ ۇشەۋىنىڭ جاعدايى اۋىر، دەپ حابارلادى ىشكى ىستەر ءمينيسترى.

- لاڭكەستەردى انىقتاۋ جۇمىستارى جالعاسۋدا. ولاردىڭ اتى-ءجونى بەلگىلى بولعاننان كەيىن ءبىز ولاردىڭ قانداي تەرروريستىك ۇيىمنان ەكەنىن حابارلايمىز، - دەدى مينيستر.

يەرليكايا تۇركيانىڭ تۇرىك حالقىنىڭ بىرلىگىنە قول سۇعۋشىلارمەن كۇرەستە تاباندىلىعىنا توقتالدى.

ەل ادىلەت ءمينيسترى يىلماز تۋنچ انكارا باس پروكۋراتۋراسىنىڭ لاڭكەستىك شابۋىلعا قاتىستى تەرگەۋ باستاعانىن ايتتى.

ايتا كەتەيىك، بۇعان دەيىن تۇركيادا تەراكت بولعانى تۋرالى جازعان ەدىك.

قاسىم-جومارت توقايەۆ تۇركيا پرەزيدەنتىنە كوڭىل ايتتى.

اۆتور
جاراسقان نۇرىبايەۆ