انانى جالعا الۋ: قازاقستاندا سۋرروگات انا قىزمەتى قانشا تۇرادى

استانا. KAZINFORM - قازاقستان كورشى ەلدەردەن كەلەتىن بەدەۋ ەرلى-زايىپتىلار ءۇشىن تارتىمدى ەلگە اينالىپ وتىر. ق ر ەمحانالارىندا جاساندى ۇرىقتاندىرۋ باعدارلاماسىنىڭ باعاسى تومەن، ال ەل زاڭناماسى سۋرروگات انانىڭ قىزمەتىن پايدالاناتىن جۇپتارعا ىڭعايلانعان. ءبىزدىڭ ەلدە بىرەۋدىڭ بالاسىن كوتەرىپ جۇرگەن ايەل ونى وزىنە الىپ قالا المايدى، ءسابيدى گەنەتيكالىق اتا-اناسىنا بەرۋگە مىندەتتى.

ق ر- دا سۋرروگات انا بولۋ قاتاڭ رەتتەلەدى جانە جۇكتىلىك كەزىندە فيگۋراسىن بۇزۋدان قورقاتىن باي ايەلدەردىڭ ىڭعايىنا جىعىلمايتىنىن اتاپ وتكەن ءجون.

زاڭ بويىنشا سۋرروگات انا قىزمەتىن تەك مىنا شارتتى ورىنداعان ەرلى-زايىپتىلار پايدالانا الادى: نەكەسى تىركەلگەن، بەدەۋلىك دياگنوزى قويىلعان، ايەل فيزيولوگيالىق تۇرعىدان بالا كوتەرۋگە جانە بوسانۋعا قابىلەتسىز ەكەنى ناقتىلانعان.

سۋرروگات انا باعدارلاماسى قىمبات تۇرادى. Ranking.kz رەداكسياسى وسى قىزمەت نارىعىنا مونيتورينگ جۇرگىزىپ، سۋرروگات ىزدەۋدىڭ كەم دەگەندە ءۇش ارناسىن تاپتى.

ەڭ قاراپايىم جانە ارزان، ءبىراق زاڭ جاعىنان ەڭ قاۋىپتىسى - اگرەگات سايتتارداعى نەمەسە الەۋمەتتىك جەلىلەردەگى جەكە جارنامالار.

وعان سەنسەك، قازاقستاندىق سۋرروگات انالار 2,5 ميلليون تەڭگەدەن 9 ميلليون تەڭگەگە دەيىن سوماعا وزگەنىڭ بالاسىنا ۋاقىتشا انا بولۋعا دايىن.

سونىمەن قاتار، ولاردىڭ قىزمەتىنە ەڭ جوعارى باعانى بەدەۋ جۇپتارعا بالا اكەلۋدە قوماقتى تاجىريبەسى بار ايەلدەر بەلگىلەيدى.

سۋرروگات انانى تابۋدىڭ ەكىنشى نۇسقاسى - رەپرودۋكتيۆتى مەديتسينا كلينيكاسىنا تىكەلەي حابارلاسۋ.

ە ك ۇ ورتالىقتارىنا مونيتورينگ جۇرگىزگەن كەزدە ولاردىڭ از عانا بولىگىندە سەنىمدى سۋرروگات انالاردىڭ جەكە مالىمەتتەر بازاسى بار ەكەنى بەلگىلى بولدى.

بۇل ايەلدەر قىزمەتىنىڭ قۇنى - 3-7 ميلليون تەڭگە ارالىعىندا.

ە ك ۇ كلينيكالارىنىڭ كوبىندە ۇمىتكەرلەردىڭ جەكە ءتىزىمى جوق جانە ولار سۋرروگات انا اگەنتتىكتەرىنىڭ قىزمەتىن پايدالانۋدى ۇسىنادى.

قازاقستاندا مۇنداي ۇيىمداردىڭ سانى تۋرالى رەسمي مالىمەت جوق. نارىقتى سارالاي كەلە الماتى مەن استانادان وسىنداي 10 نان استام اگەنتتىكتى انىقتادىق.

ولاردىڭ سايتىنداعى دەرەكتەرگە قاراعاندا، سۋرروگات انا اقىسى 4,5-8 ميلليون تەڭگە ارالىعىندا اۋىتقيدى.

سونداي-اق رەسەيلىك اگەنتتىكتەردىڭ قازاقستانداعى سۋرروگات انالاردىڭ قىزمەتتەرى تۋرالى حابارلاندىرۋلار دا جەلىدە جاريالانعان. مۇنداي جاعدايدا قۇنى جوعارى: 7 ميلليون تەڭگەدەن 13 ميلليون تەڭگەگە دەيىن.

بۇل ساندار - ەرلى-زايىپتىلار تولەيتىن تولىق سوما ەمەس. بۇل ەرەكشە قىزمەت تەك قىمبات رەپرودۋكتيۆتى تەحنولوگيانىڭ كومەگىمەن جۇزەگە اسۋى مۇمكىن.

سوندىقتان ە ك ۇ باعدارلامالارىنىڭ قۇنىن ەسكەرۋ قاجەت. گەنەتيكالىق اتا-انانىڭ مۇنداي جاعدايدا جۇمسايتىن شىعىنىن ەسەپتەۋ كەزىندە ءبىز بارلىق نەگىزگى مىندەتتى جانە قوسىمشا قىزمەتتەردى ەسكەردىك.

سۋرروگات انا شىعىنىنىڭ نەگىزگى پاكەتىنە ايەلدىڭ سوڭعى جارناسى عانا ەمەس، ونىڭ اي سايىنعى كۇتىمى دە (200 مىڭ تەڭگەدەن 250 مىڭ تەڭگەگە دەيىن) كىرەدى.

مىندەتتى شىعىن - گەنەتيكالىق اتا-اناعا ارنالعان ە ك ۇ باعدارلاماسىن تىكەلەي جۇزەگە اسىرۋ مەديتسينالىق تەكسەرۋدى ەسەپكە العاندا 1,5-2 ميلليون تەڭگە تۇرادى.

اتالىق جىنىس جاسۋشالارىن جويۋ نەمەسە ەمبريونعا قوسىمشا گەنەتيكالىق زەرتتەۋ جۇرگىزۋ ءۇشىن حيرۋرگيالىق مەديتسينالىق پروتسەدۋرالاردى جۇرگىزۋ قاجەت بولسا، سوما ودان دا جوعارى بولۋى مۇمكىن.

مىندەتتى شىعىندارعا گەنەتيكالىق اتا-انالار مەن سۋرروگات انا اراسىندا كەلىسىم جاساۋ بويىنشا نوتاريالدىق قىزمەتتەر دە كىرەدى: شامامەن 60 مىڭ تەڭگە.

وسىلايشا، سۋرروگات انا باعدارلاماسىنىڭ ماڭىزدى كەزەڭدەرىن جۇزەگە اسىرۋعا قاجەتتى نەگىزگى سوما - 6,7 ميلليوننان 11,3 ميلليون تەڭگە ارالىعىندا.

شىعىننىڭ قوسىمشا پاكەتى ءۇشىن تاعى 3,1 ميلليون تەڭگەدەن 4,2 ميلليون تەڭگەگە دەيىن ءبولۋ قاجەت. ول جۇكتىلىك نەمەسە بوسانۋ كەزىندە كۇتپەگەن جەردەن تۋىنداۋى مۇمكىن شىعىنداردى، سونداي-اق تاڭداۋ قىزمەتتەرىن قامتيدى.

مىسالى، مامانداندىرىلعان مەكەمەگە حابارلاسقاندا سۋرروگات انانى تاڭداۋ ءۇشىن اگەنتتىك اقى تالاپ ەتۋى مۇمكىن (550 مىڭ تەڭگەدەن 1 ميلليون تەڭگەگە دەيىن).

باسقا قالادان كەلگەن گەنەتيكالىق اتا-اناعا ۇيىمدار كۋراتورلىق قولداۋ مەن پاتروناتتىق قىزمەتتەردى دە ۇسىنادى (ءبىر جۇكتىلىككە 1 ميلليون تەڭگەگە دەيىن).

بۇل - اگەنتتىك كۋراتورى سۋرروگات انانى ۇنەمى اۋرۋحاناعا اپاراتىن، تۋىنداعان ماسەلەنى شەشۋگە كومەكتەسەتىن جانە باسقا مۇمكىندىك بەرەتىن نۇسقا.

قولداۋدىڭ VIP پاكەتىنە ءتىپتى سۋرروگات انانىڭ تاماقتانۋىن باقىلاۋ، وعان كىتاپ تاڭداۋ، ونىڭ ءۇيىن اپتا سايىن تازالاۋ جانە باسقا قىزمەتتەر كىرەدى.

ماڭىزدى قوسىمشا قىزمەتتەرگە تابيعيدان ەرەكشەلەنەتىن جانە دارىگەرلەردىڭ ەرەكشە نازارىن تالاپ ەتەتىن سۋرروگات انانىڭ جۇكتىلىگىن باسقارۋعا ارنالعان اقىلى باعدارلامالار (400 مىڭ تەڭگەگە دەيىن) جانە قالاعان جاعدايدا اقىلى بوسانۋ (تاعى 120- 400 مىڭ تەڭگە) كىرەدى.

ەگەر سۋرروگات انا ەگىز بالانى دۇنيەگە اكەلسە نەمەسە دارىگەرلەر بوسانۋ ءۇشىن حيرۋرگيالىق وتانى تاڭداسا، ايەلگە قوسىمشا وتەماقى تولەۋگە تۋرا كەلەدى.

سۋرروگات انا باعدارلاماسى بويىنشا مىندەتتى جانە قوسىمشا قىزمەتتەردى قورىتىندىلاساق، شىعىن مىناداي: 9,8 ميلليون تەڭگەدەن 15,5 ميلليون تەڭگەگە دەيىن.

ۇلتتىق بانكتىڭ بيىلعى اقپان ايىنداعى باعامى بويىنشا بۇل سوما 21,8 مىڭنان 34,4 مىڭ ا ق ش دوللارىنا دەيىن جەتەدى.

الىنعان مالىمەتتى وزگە ەلدەردەگى سۋرروگات انا باعدارلامالارىنىڭ قۇنىمەن سالىستىرايىق. اشىق كوزدەن الىنعان اقپاراتقا قاراعاندا، ەڭ جوعارى باعانى مۇنداي باعدارلامالارعا تىيىم سالىنباعان ەۋروپا ەلدەرىندە تابۋعا بولادى.

مىسالى، چەحيادا سۋرروگات انا باعدارلاماسى - 65-85 مىڭ، بەلگيادا - 54-65 مىڭ، دانيادا - 50- 60 مىڭ ا ق ش دوللارى.

ەڭ جاقىن كورشىمىز رەسەيدە مۇنداي باعدارلامالاردىڭ باعاسى ەۋروپالىقتارمەن شامالاس: 60 مىڭ ا ق ش دوللارىنا دەيىن بارادى.