«اناشىم، قايداسىڭ؟» بەلگيالىقتار اسىراپ العان جانىبەك قازاقستاندىقتارعا ۇندەۋ جاسادى
بەلگيالىق جانىبەك اتالىپ كەتكەن مۇرات ساۆەليەۆ جاڭا جىل قارساڭىندا قازاقستاندىقتارعا ۇندەۋ جاسادى.
جانىبەكتىڭ ايتۋىنشا، بيىل قۋانتقان، مۇڭايتقان ساتتەر دە بولعان، ءبىراق ونى مازالايتىن جالعىز سۇراق:«اناشىم، قايداسىڭ؟»
«كەيدە مەنەن نەگە انامدى نەمەسە وتباسىمدى تاپقىم كەلەتىنىن سۇرايتىندار بار، بۇل سۇراقتىڭ جاۋابى تۇسىنىكتى دەپ ويلايمىن. ادامعا ءومىردى بىرگە سۇرەتىن اناسى، اكەسى، اعا- ءىنىسى، قارىنداس- اپكەسى بولۋى كەرەك قوي. بولەك قالىپ، جىلاپ جۇرمەي، بىرگە ءجۇرىپ، مىقتى بولعان دۇرىس دەپ ويلايمىن. مىسالى، اتا-اناممەن، اعا-قارىنداسپەن بىرگە جاڭا جىل مەرەكەسىن تويلاسام، كەرەمەت ەمەس پە؟ مەنىڭ جاڭا جىلدىق سىيلىعىم - وزدەرىڭىز، بۇل ءسوزسىز!»، - دەپ جازدى ول.
ول سونىمەن بىرگە اكە-شەشەسىندەي جاقسىلىق تىلەپ وتىراتىن قازاق ەلى بار دەگەن ويدىڭ ءوزى جۇرەگىنە جىلۋ سىيلايتىنىن ايتتى.
ەسكە سالايىق، بۇعان دەيىن دە جانىبەك الەۋمەتتىك جەلىدەگى پاراقشاسىندا جان سىرىن اقتارىپ، كەيىنگى ۋاقىتتا ءومىرىنىڭ قيىنداپ كەتكەنىن ايتقان ەدى.
Massaget.kz
