انا ءسۇتىنىڭ بالاعا قانداي پايداسى بار

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، الەمدە شامامەن 3 ميلليون نارەستە 4 اپتالىق مەرزىمىنە جەتپەي شەتىنەپ كەتەدى ەكەن.

Фото: pixabay.com
Фото: из открытых источников

ەرتە ولىمگە شالدىعۋ جانە بالالاردىڭ وسى جاستا شالدىعاتىن ءارتۇرلى اۋرۋلارىنىڭ الدىن الۋعا باعىتتالعان قاراپايىم تەحنولوگيالارىنىڭ ءبىرى انا سۇتىمەن ەمىزۋ، دەپ حابارلايدى قازاقپارات.

وسى ۇيىم ساراپشىلارىنىڭ زەرتتەۋىنە سۇيەنسەك، ەگەر بارلىق بالا تۋا سالا تەك انا سۇتىمەن قورەكتەنسە، وندا جىل سايىن شامامەن 1,5 ميلليون بالانى اجالدان اراشالاۋعا مۇمكىندىك بولادى ەكەن.

انا ءسۇتى - ءسابيدىڭ العاشقى 2 جىل ومىرىندە تەڭدەسى جوق تاعام. انا ءسۇتى عانا ءسابيدىڭ تولىققاندى فيزيكالىق ءوسۋىن، اقىل-ويىنىڭ قالىپتاسۋىن، پسيحولوگياىق دامۋىن قامتاماسىز ەتە الادى جانە قۇرامىندا بالانىڭ ءوسىپ-دامۋىنا قاجەتتى بارلىق قورەكتىك زاتتەك تولىق، ۇيلەسىمدى قاتىناستا.

اس قورىتۋ فەرمەنتتەرىنىڭ تولىق جەتىلمەۋىنە بايلانىستى نارەستە ءالى باسقا تاعام تۇرلەرىن قورىتا المايدى. سوندىقتان انا ءسۇتى قورىتۋ، ءسىڭىرۋ، الماسۋ ۇردىستەرىنىڭ ەرەكشەلىگىنە ساي قاجەتتى فەرمەنتتەرمەن قامتاماسىز ەتەدى.

انا سۇتىمەن ۇزاق جانە تولىققاندى قورەكتەنۋ بالا اعزاسىن تەك قاجەتتى زاتتەكتەرمەن قامتاماسىز ەتىپ قويماي، سونىمەن قاتار كوپتەگەن اۋرۋدان ساقتايدى: ءجيى سۋىق تيۋ، ياعني تىنىس جولدارىنىڭ قابىنۋىنان، ۆيرۋستىق، جۇقپالى، ىشەك اۋرۋلارىنان، سالماق ازدىق (گيپوتروفيا)، راحيت، تەمىر تاپشىلىعى، انەميا، 2- ءتيپتى قانت ديبەتى، سەمىزدىك سياقتى اۋرۋلاردان قورعايدى.

قورىتا كەلە، انا ءسۇتىنىڭ بالا اعزاسىنا تيگىزەتىن پايداسىن تومەندەگىدەي تۇيىندەۋگە بولادى:

- بالالار ديابەتىنىڭ، قاتەرلى ىسىكتەردىڭ، قۇلاق ينفەكتسيالارىنىڭ دامۋ قاۋپىن تومەندەتەدى؛

- ەكپەدەن كەيىن وڭتايلى رەاكتسيا كورسەتەدى جانە اۋرۋلارعا قارسى تۇرۋ قابىلەتىن جوعارىلاتادى؛

- پسيحوموتورلىق، ەموتسيونالدىق جانە الەۋمەتتىك دامۋىنا كومەكتەسەدى.

ال بوسانعان ايەلدەردىڭ اعزاسىنا بالانى ەرتە جانە ۇزاق ەمىزۋدىڭ پايداسى زور:

- بوسانعاننان كەيىنگى قان كەتۋدىڭ توقتاۋىن، بالا جولداسىنىڭ تەز اجىراۋىن، بالا ءوربىتۋ اعزالارىنىڭ قالىپقا كەلۋىن تەزدەتەدى؛

- وتباسىن جوسپارلاۋدا ءتيىمدى قۇرال بولىپ cانالادى. سەبەبى نەعۇرلىم بەلسەندى جانە ۇزاق ەمىزگەن سايىن كەلەسى جۇكتىلىككە فيزيولوگيالىق تۇرعىدا توتەپ بەرەدى؛

- وتباسى قارجىسىن ۇنەمدەۋگە ۇلكەن ۇلەس قوسادى، ياعني وندىرىستىك ءسۇت جانە باسقا دا قوسپالاردى ساتىپ الۋدىڭ قاجەتى بولمايدى.

انا ءسۇتى - جاڭادان دۇنيەگە كەلگەن بالا ءۇشىن تەڭدەسى جوق تابيعي سىي جانە دەنساۋلىعى مەن ۇزاق، باقىتتى ءومىر ءسۇرۋىنىڭ ىرگەتاسى.

سوڭعى جاڭالىقتار