امەريكالىق ەرلى-زايىپتىلارعا قوس ازاماتتىعى ءۇشىن 738 مىڭ تەڭگە ايىپپۇل سالىندى
استانا. KAZINFORM - امەريكالىق ەرلى-زايىپتىلارعا قوس ازاماتتىعى ءۇشىن 738 مىڭ تەڭگە ايىپپۇل سالىندى.
Polisia.kz- ءتىڭ مالىمەتىنشە، ءبىرىنشى جارتىجىلدىقتا كولىكتەگى پوليتسيا دەپارتامەنتىنىڭ قىزمەتكەرلەرى ق ر كوشى-قون زاڭناماسىن بۇزعانى ءۇشىن 1483 شەتەلدىكتى اكىمشىلىك جاۋاپكەرشىلىككە تارتتى، ونىڭ ىشىندە سوت شەشىمى بويىنشا 484 شەتەلدىك ازامات ەلدەن شىعارىلدى.
قوس ازاماتتىعى بار 181 تۇلعا انىقتالىپ، ولار بويىنشا ءتيىستى شارالار قابىلداندى. ماسەلەن تۇركىستان قالاسى اۋەجايىنداعى جەلىلىك پوليتسيا بولىمشەسىنىڭ كوشى-قون قىزمەتىنىڭ قىزمەتكەرلەرى ق ر ۇ ق ك- ءنىڭ شەكارا قىزمەتىمەن بىرلەسىپ، تۇركىستان-ستامبۇل باعىتىنداعى اۋە رەيسىنە تىركەلۋ كەزىندە قازاقستان رەسپۋبليكاسىنىڭ ازاماتتىعى تۋرالى زاڭناماسىن بۇزعان ەرلى-زايىپتىلار انىقتالدى. ولار 54 جانە 45 جاستاعى ا ق ش ازاماتتارى بولىپ شىقتى.
كولىك پوليتسەيلەرى قۇقىق بۇزۋشىلارعا قاتىستى قازاقستان رەسپۋبليكاسىنىڭ زاڭناماسىندا بەلگىلەنگەن مەرزىمدە شەتەل ازاماتتىعىن الۋ فاكتىسىن حابارلاماعانى ءۇشىن اكىمشىلىك حاتتاما تولتىرىپ، ماتەريالدى تۇركىستان وبلىسىنىڭ مامانداندىرىلعان اكىمشىلىك سوتىنا جولدادى.
سوت شەشىمى بويىنشا شەتەل ازاماتتارى 200 ا ە ك (738400 تەڭگە) مولشەرىندە اكىمشىلىك ايىپپۇل تۇرىندە اكىمشىلىك جاۋاپكەرشىلىككە تارتىلدى.
